लंडन, 12 मे (हिं.स.)।अवघ्या चार वर्षांपूर्वी विद्यार्थी व्हिसावर स्कॉटलंडमध्ये पोहोचलेले तमिळनाडूतील भारतीय पीएचडी विद्यार्थी क्यू मणिवन्नन यांनी स्थानिक निवडणुकीतील विजयाला ब्रिटनच्या राजकारणातील स्थलांतर, ओळख आणि प्रतिनिधित्व या व्यापक मुद्द्यांशी जोडले आहे. स्वतःला नॉन-बायनरी मानणारे मणिवन्नन सत्तेत विविधतेचे प्रतिनिधित्व करत असल्याचा दावा करतात. क्यू मणिवन्नन हे स्कॉटिश संसद (होलिरूड) चे नव्याने निवडून आलेले सदस्य आहेत.

डॉक्टरेटचे शिक्षण घेणाऱ्या मणिवन्नन यांची स्कॉटिश ग्रीन्स पक्षाच्या एडिनबर्ग आणि लोथियन्स ईस्ट प्रादेशिक यादीतून स्कॉटिश संसदेसाठी निवड झाली. आपल्या समर्थकांमध्ये उभे राहून मणिवन्नन म्हणाले, “मी एक ट्रान्सजेंडर तमिळ स्थलांतरित आहे. या देशातील काही लोकांसाठी मी त्या सर्व गोष्टींचे प्रतीक आहे ज्यांचा द्वेष करणारे लोक तिरस्कार करतात. तरीही आज मी तुमचा एमएसपी (स्कॉटिश संसद सदस्य) म्हणून अत्यंत जबाबदारीने येथे उभा आहे.”

त्यांच्या निवडीनंतर स्थलांतरविरोधी गटांनी त्या नियमांवर टीका केली आहे, ज्यामुळे स्कॉटलंडमध्ये राहणाऱ्या काही परदेशी नागरिकांना निवडणूक लढवण्याची परवानगी मिळते. राष्ट्रकुल देशाचा नागरिक असल्याने नियमांतील बदलांमुळे अल्पकालीन व्हिसावर राहणारे किंवा कायमस्वरूपी वास्तव्यास असलेले लोकही स्कॉटलंडमध्ये निवडणूक लढवण्यासाठी पात्र ठरले आहेत.

स्थलांतर नियंत्रणासाठी मोहीम राबवणाऱ्या ‘मायग्रेशन वॉच’ या संस्थेने म्हटले की, ब्रिटिश निवडणुकांमध्ये राष्ट्रकुल देशांच्या नागरिकांना मिळणारा स्वयंचलित मतदानाचा अधिकार आणि गैर-ब्रिटिश नागरिकांना निवडणूक लढवण्याची परवानगी संपुष्टात आणली पाहिजे. स्कॉटिश ग्रीन्स पक्षाच्या सह-नेत्या गिलियन मॅके यांनी सांगितले की, पक्ष मणिवन्नन यांच्या नव्या व्हिसा अर्ज प्रक्रियेत त्यांना पूर्ण पाठिंबा देईल. ग्रीन्स पक्षाने स्पष्ट केले की, ही प्रक्रिया संसदेचे अधिवेशन सुरू असतानाच पूर्ण करावी लागेल.

मणिवन्नन यांच्या निवडणूक पत्रकात त्यांचा उल्लेख “राजकारणातील पीएचडी विद्यार्थी, कला कार्यकर्ते, स्कॉटिश ग्रीन पार्टीच्या पॅलेस्टाईन एकजूट गटाचे सह-संयोजक आणि संयुक्त राष्ट्रांचे माजी आरोग्य कर्मचारी” असा करण्यात आला आहे.

---------------

हिंदुस्थान समाचार / Priyanka Bansode