मॉस्को, 24 मे (हिं.स.)।रशियाने शनिवारी रात्रभर युक्रेनवर जोरदार हल्ले करत हायपरसॉनिक ‘ओरेश्निक’सह चार प्रकारच्या क्षेपणास्त्रांचा वापर केला. मॉस्कोकडून सांगण्यात आले की, रशियातील नागरी ठिकाणांवर कीवने केलेल्या हल्ल्यांना प्रत्युत्तर म्हणून ही कारवाई करण्यात आली.

रशियाच्या सरकारी वृत्तसंस्थांच्या माहितीनुसार, या हल्ल्यांमध्ये ओरेश्निक, इस्कंदर, किंझल आणि झिरकॉन क्षेपणास्त्रांचा वापर करण्यात आला. रशियन संरक्षण मंत्रालयाच्या हवाल्याने दिलेल्या वृत्तानुसार, या हल्ल्यांमध्ये युक्रेनचे लष्करी कमांड सेंटर, हवाई तळ आणि युक्रेनच्या लष्करी-औद्योगिक क्षेत्राशी संबंधित कंपन्यांना लक्ष्य करण्यात आले. मॉस्कोने दावा केला की सर्व हल्ले यशस्वी ठरले. मात्र, युद्धभूमीवरील या दाव्यांची स्वतंत्रपणे पुष्टी करता आली नाही.दरम्यान, युक्रेनचे राष्ट्राध्यक्ष वोलोदिमिर झेलेन्स्की यांनी सांगितले की, रशियाने कीववर रात्रभर केलेल्या मोठ्या हल्ल्यात हायपरसॉनिक ‘ओरेश्निक’ बॅलिस्टिक क्षेपणास्त्राचा वापर केला.

एका पोस्टमध्ये झेलेन्स्की यांनी सांगितले की, हे क्षेपणास्त्र कीव प्रदेशातील बिला त्सेरक्वा शहरात पडले. मात्र, त्याचे मूळ लक्ष्य काय होते हे तातडीने स्पष्ट होऊ शकले नाही. युक्रेनच्या वायुदलाच्या माहितीनुसार, कीववरील या रात्रभर चाललेल्या हल्ल्यात ६०० ड्रोन आणि हवाई, सागरी तसेच जमिनीवरून डागल्या जाणाऱ्या ९० क्षेपणास्त्रांचा वापर करण्यात आला. वृत्तांनुसार, युक्रेनच्या हवाई संरक्षण प्रणालीने ५४९ ड्रोन आणि ५५ क्षेपणास्त्रे नष्ट केली किंवा त्यांना जॅम केले, तर सुमारे १९ क्षेपणास्त्रे लक्ष्यापर्यंत पोहोचू शकली नाहीत.

युक्रेनच्या वायुदलाने सांगितले की, रशियाच्या अस्त्राखान भागातील कापुस्तिन यार केंद्रातून मध्यम पल्ल्याचे बॅलिस्टिक क्षेपणास्त्र डागण्यात आले. हे केंद्र ओरेश्निक क्षेपणास्त्राच्या लॉन्च पॅडसाठी ओळखले जाते. वायुदलाने अधिकृतपणे या क्षेपणास्त्राच्या वापराची पुष्टी केली नसली, तरी याआधी संभाव्य प्रक्षेपणाबाबत इशारा देण्यात आला होता. स्थानिक अधिकाऱ्यांनी दिलेल्या प्राथमिक माहितीनुसार, या हल्ल्यांत किमान दोन जणांचा मृत्यू झाला असून ५६ जण जखमी झाले आहेत.

कीवच्या मध्यवर्ती भागात सरकारी इमारतींजवळ स्फोटांचे आवाज ऐकू आले, तर शहरातील अनेक जिल्ह्यांमध्ये सुमारे ४० ठिकाणी नुकसान झाल्याची माहिती समोर आली आहे. यात निवासी इमारती, शाळा, सुपरमार्केट आणि गोदामांचा समावेश आहे.युक्रेनच्या राज्य आपत्कालीन सेवेनुसार, कीवच्या शेवचेंको जिल्ह्यातील एका पाच मजली निवासी इमारतीवर हल्ला झाल्यानंतर आग लागली, ज्यात एका व्यक्तीचा मृत्यू झाला. महापौर विताली क्लित्स्को यांनी सांगितले की, एका शाळेच्या इमारतीलाही नुकसान झाले असून त्या वेळी तिच्या आत सामान्य नागरिकांनी आश्रय घेतला होता.

---------------

हिंदुस्थान समाचार / Priyanka Bansode