नवी दिल्ली, 13 मे (हिं.स.)। पश्चिम आशियातील संकटाच्या पार्श्वभूमीवर रुपयाला आधार देण्यासाठी केंद्र सरकारने सोने आणि चांदीवरील आयात शुल्क वाढवून १५ टक्के केले आहे. हे दर बुधवारपासून लागू झाले आहेत. वित्त मंत्रालयाने यासंदर्भात मंगळवारी उशिरा रात्री अधिसूचना जारी केली. त्यानुसार, सरकारने सोने आणि चांदीच्या आयातीवर १० टक्के मूलभूत सीमाशुल्क आणि ५ टक्के कृषी पायाभूत सुविधा व विकास उपकर लागू केला आहे. त्यामुळे प्रभावी आयात कर ६ टक्क्यांवरून वाढून १५ टक्के झाला आहे. हे दर १३ मेपासून लागू करण्यात आले आहेत.

वित्त मंत्रालयाच्या अधिसूचना क्रमांक १६/२०२६ अंतर्गत सीमाशुल्काद्वारे मौल्यवान धातू आणि त्यापासून तयार करण्यात आलेल्या वस्तूंवरील सीमाशुल्क दर अद्ययावत करण्यात आले आहेत. अधिसूचनेनुसार, सोने आणि चांदीपासून तयार वस्तूंवर ५ टक्के शुल्क आकारले जाणार आहे, तर प्लॅटिनमपासून तयार वस्तूंवर हे शुल्क ५.४ टक्के असेल. याशिवाय, मौल्यवान धातूंनी बनवलेल्या वापरलेल्या उत्प्रेरकांवर ४.३५ टक्के शुल्क निश्चित करण्यात आले आहे, मात्र त्यासाठी संबंधित अनुपालन निकष पूर्ण करणे आवश्यक असणार आहे.

२०२५-२६ मध्ये भारताची सोन्याची आयात २४ टक्क्यांहून अधिक वाढून ७१.९८ अब्ज डॉलर्सच्या विक्रमी उच्चांकावर पोहोचला. तथापि, प्रमाणाच्या बाबतीत, २०२५-२६ मध्ये आयात ४.७६ टक्क्यांनी घटून ७२१.०३ टन झाला. २०२५-२६ या आर्थिक वर्षात सोन्याची किंमत वाढून ९९,८२५.३८ डॉलर प्रति किलोग्रॅम झाली, जी २०२४-२५ मध्ये ७६,६१७.४८ डॉलर प्रति किलोग्रॅम होती.

राष्ट्रीय राजधानी दिल्लीमध्ये मंगळवारी सोन्याच्या किंमतीत १,५०० रुपयांची म्हणजेच जवळपास एक टक्क्यांची वाढ होऊन ती १० ग्रॅममागे १,५६,८०० रुपयांवर पोहोचली. तर चांदीच्या किंमतीत १२,००० रुपयांची म्हणजेच ४.५३ टक्क्यांची वाढ होऊन ती प्रति किलोग्रॅम २,७७,००० रुपयांवर पोहोचली.

आंतरराष्ट्रीय बाजारात सोन्याची किंमत ४२.३३ डॉलर म्हणजेच एक टक्का घसरून ४,६९२.६४ डॉलर प्रति औंसवर राहिली, तर चांदीच्या किंमतीत ३.०४ टक्क्यांची घसरण होऊन ती ८३.४९ डॉलर प्रति औंसवर आली.

---------------

हिंदुस्थान समाचार / Suraj Chaugule