मुंबई, 13 मे (हिं.स.)। स्वदेशी वाहन निर्माता टाटा मोटर्सने आपल्या प्रीमियम हॅचबॅक टाटा अल्ट्रोझ आयसीएनजीचे एएमटी ट्रान्समिशनसह नवीन मॉडेल भारतीय बाजारात लाँच केले आहे. या नव्या व्हेरियंटची सुरुवातीची एक्स-शोरूम किंमत ८.६९ लाख रुपये ठेवण्यात आली आहे. विशेष म्हणजे, सीएनजी पॉवरट्रेनसह एएमटी ट्रान्समिशन देणारी टाटा अल्ट्रोझ ही भारतातील एकमेव प्रीमियम हॅचबॅक ठरली आहे. दैनंदिन शहरातील वाहतुकीत सतत गिअर बदलण्याचा त्रास टाळत कमी खर्चात वाहन चालवू इच्छिणाऱ्या ग्राहकांसाठी कंपनीने हा पर्याय उपलब्ध करून दिला आहे.

टाटा अल्ट्रोझ आयसीएनजी एएमटी पाच वेगवेगळ्या ट्रिममध्ये सादर करण्यात आली आहे. यात प्युअर, प्युअर एस, क्रिएटिव्ह, क्रिएटिव्ह एस आणि अकॉम्प्लिश्ड एस या प्रकारांचा समावेश आहे. प्युअर व्हेरियंटची किंमत ८.७० लाख रुपये, प्युअर एसची ९ लाख रुपये, क्रिएटिव्हची ९.५७ लाख रुपये, क्रिएटिव्ह एसची ९.८२ लाख रुपये तर अकॉम्प्लिश्ड एसची किंमत १०.७७ लाख रुपये ठेवण्यात आली आहे.

या हॅचबॅकमध्ये १.२ लिटर रेवोट्रॉन आयसीएनजी इंजिन देण्यात आले असून सीएनजी मोडमध्ये हे इंजिन ७२.५ बीएचपी पॉवर आणि १०३ न्यूटन मीटर टॉर्क निर्माण करते. टाटा मोटर्सने प्रथमच हा सेटअप एएमटी ट्रान्समिशनसह सादर केला आहे. त्यामुळे शहरातील गर्दीच्या रस्त्यांवर वाहन चालवणे अधिक सोपे होणार आहे. कंपनीच्या मते, सिंगल अॅडव्हान्स्ड ईसीयू प्रणालीमुळे पेट्रोल आणि सीएनजी मोडमध्ये वाहन सहजपणे बदल करू शकते.

टाटा मोटर्सच्या ट्विन सिलेंडर आयसीएनजी तंत्रज्ञानामुळे सीएनजी सिलेंडर लगेज फ्लोअरखाली बसवण्यात आले आहेत. त्यामुळे सीएनजी मॉडेलमध्येही २१० लिटर बूट स्पेस उपलब्ध होते. पेट्रोल आणि डिझेल व्हर्जनमध्ये ३४५ लिटर बूट स्पेस दिली जाते. वाहनात फ्लश डोअर हँडल, इन्फिनिटी कनेक्टेड एलईडी टेल लॅम्प, डीआरएलसह एलईडी हेडलॅम्प आणि हार्मनची १०.२५ इंचांची ट्विन डिजिटल स्क्रीन यांसारखी आधुनिक वैशिष्ट्ये देण्यात आली आहेत.

सुरक्षेच्या दृष्टीनेही टाटा अल्ट्रोझ आयसीएनजीला महत्त्वाचे स्थान मिळाले आहे. अल्ट्रा हाय स्ट्रेंथ स्टीलपासून तयार करण्यात आलेल्या अल्फा प्लॅटफॉर्मवर आधारित या कारला पेट्रोल, डिझेल आणि सीएनजी प्रकारांमध्ये पाच स्टार भारत एनकॅप सुरक्षा मानांकन मिळाले आहे. वाहनात सहा एअरबॅग, इलेक्ट्रॉनिक स्टॅबिलिटी प्रोग्राम, आयसोफिक्स, रिव्हर्स पार्किंग सेन्सर, ३६० डिग्री एचडी सराउंड व्ह्यू प्रणाली, टायर प्रेशर मॉनिटरिंग प्रणाली, ऑटो हेडलॅम्प आणि एलईडी फॉग लॅम्प यांसारखी प्रगत सुरक्षा वैशिष्ट्ये देण्यात आली आहेत.

---------------

हिंदुस्थान समाचार / Suraj Chaugule