नवी दिल्ली, 21 मे (हिं.स.)फिफा विश्वचषक २०२६ सुरू होण्यापूर्वीच ब्राझीलला मोठा धक्का बसला आहे. स्टार फुटबॉलपटू नेमार पुन्हा जखमी झाला आहे. त्याची नुकतीच ब्राझीलच्या विश्वचषक संघात निवड झाली होती. सँटोसचा हा स्टार फुटबॉलपटू पोटरीच्या दुखापतीमुळे बुधवारी सॅन लोरेन्झोविरुद्धचा आपल्या संघाचा घरच्या मैदानावरचा कोपा सुदामेरिकाना सामना खेळू शकला नाही. पण, ब्राझीलच्या क्लबने नेमारची दुखापत गंभीर असल्याचे म्हटलेले नाही. सँटोस संघाचे डॉक्टर रॉड्रिगो झोगाइब यांनी सांगितले की, हा फॉरवर्ड फुटबॉलपटू २७ मे रोजी होणाऱ्या ब्राझीलच्या विश्वचषकापूर्वीच्या पहिल्या सराव सत्रासाठी तयार असेल.

नेमार पूर्णपणे तंदुरुस्त किंवा जवळपास तंदुरुस्त झाल्यावरच राष्ट्रीय संघात सामील होईल. पुढील मंगळवारी डेपोर्टिव्हो कुएंकाविरुद्ध तो खेळण्याची शक्यताही आहे. १२८ आंतरराष्ट्रीय सामन्यांमध्ये ७९ गोलसह ब्राझीलचा आघाडीचा फुटबॉलपटू असलेला नेमार, ऑक्टोबर २०२३ मध्ये ब्राझीलसाठी शेवटचा खेळला होता. उरुग्वेविरुद्धच्या विश्वचषक पात्रता सामन्यात त्याच्या गुडघ्यातील अँटेरियर क्रुशिएट लिगामेंट फाटली होती. बार्सिलोना आणि पॅरिस सेंट-जर्मेनचा हा माजी आक्रमक फुटबॉलपटू तेव्हापासून दुखापतींशी झुंजत आहे; गेल्या वर्षी जानेवारीमध्ये आपल्या बालपणीच्या क्लब सँटोसमध्ये परतल्यापासून, त्याने ३८ सामन्यांमध्ये केवळ १७ गोल केले आहेत.

हा नेमारचा चौथा फिफा विश्वचषक असेल, यापूर्वी तो २०१४, २०१८ आणि २०२२ च्या विश्वचषकांमध्ये खेळला आहे. या स्पर्धेत सर्वाधिक सामने खेळणारा ब्राझीलचा खेळाडू म्हणून तो कॅस्टिलो, जाल्मा सँटोस, निल्टन सँटोस, पेले, इमर्सन लिओ, काफू, रोनाल्डो आणि थियागो सिल्वा यांच्या पंक्तीत सामील होईल.

नेमारला पेले यांच्या पंक्तीत सामील होण्याची आणि चार वेगवेगळ्या विश्वचषकांमध्ये ब्राझीलची १० क्रमांकाची जर्सी परिधान करणारा दुसरा फुटबॉलपटू बनण्याची संधी देखील आहे. नेमारने विश्वचषकात १३ सामने खेळून आठ गोल केले आहेत आणि तीन असिस्ट दिले आहेत. ब्राझील आपल्या स्पर्धेतील मोहिमेची सुरुवात १३ जून रोजी न्यू जर्सीमध्ये मोरोक्कोविरुद्ध करेल, त्यानंतर गट 'क' मध्ये हैती आणि स्कॉटलंडविरुद्ध सामने होणार आहेत.

---------------

हिंदुस्थान समाचार / वृषाली देशपांडे