तेहरान , 26 मे (हिं.स.)।इराणने आपल्या हवाई हद्दीचे उल्लंघन केल्याप्रकरणी अमेरिकेचे एमक्यू-९ रीपर ड्रोन पाडल्याचा दावा केला आहे. इराणी सैन्याच्या म्हणण्यानुसार, त्यांच्या रडार प्रणालीने आखाती प्रदेशात अमेरिकन घुसखोरीचा मागोवा घेतला होता. त्यानंतर सुरक्षा दलांनी कारवाई करत हे धोकादायक ड्रोन उद्ध्वस्त केले.

याशिवाय, इराणी सैन्याने त्या परिसरात उपस्थित असलेल्या आणखी एका अमेरिकन आरक्यू-४ ड्रोन आणि एफ-३५ लढाऊ विमानालाही लक्ष्य केले. त्यानंतर या दोन्ही अमेरिकन यंत्रणांनी माघार घेतल्याचे सांगितले जात आहे.

ही घटना अशा वेळी घडली आहे, जेव्हा या प्रदेशात आधीपासूनच अत्यंत संवेदनशील युद्धविराम लागू आहे. इस्लामिक रिव्होल्युशनरी गार्ड कॉर्प्स (IRGC) ने इशारा दिला आहे की, अमेरिकेकडून युद्धविरामाचे उल्लंघन झाल्यास इराणला प्रत्युत्तरात्मक कारवाई करण्याचा कायदेशीर आणि ठाम अधिकार आहे. दुसरीकडे, अमेरिकन सैन्याने म्हटले आहे की, त्यांनी आत्मसंरक्षणासाठी रॉकेट प्रक्षेपण केंद्रांना लक्ष्य करण्याची कारवाई केली होती. या घटनेनंतर दोन्ही देशांमधील तणाव पुन्हा एकदा शिगेला पोहोचला आहे.

याचदरम्यान, इराणचे नवे सर्वोच्च नेते मोजतबा खामेनेई यांनी सरकारी दूरदर्शनद्वारे एक महत्त्वपूर्ण संदेश देत अमेरिकेशिवाय नव्या प्रादेशिक व्यवस्थेची संकल्पना मांडली आहे. कॅमेऱ्यासमोर न येता जारी करण्यात आलेल्या या संदेशात त्यांनी स्पष्ट इशारा दिला की, पश्चिम आशियातील देश आता अमेरिकन लष्करी तळांसाठी ढाल बनणार नाहीत आणि या प्रदेशात अमेरिकेसाठी कोणतेही ठिकाण सुरक्षित राहणार नाही. याचा थेट अर्थ असा आहे की, इराणला किंचितही धोका जाणवल्यास तो अमेरिकन तळांवर थेट हल्ला करण्यास मागेपुढे पाहणार नाही.

खामेनेई यांनी लेबनॉनसह इराण समर्थित संघटनांचे कौतुक करत दावा केला की, त्यांनी अमेरिका आणि इस्रायलला कठोर धडा शिकवला आहे. यासोबतच त्यांनी सर्व इस्लामी देशांना परस्पर मतभेद विसरून नव्या आघाडीसाठी एकत्र येण्याचे आवाहन केले आहे.

---------------

हिंदुस्थान समाचार / Priyanka Bansode