जेरुसलेम, 26 मे (हिं.स.)।इस्रायलचे पंतप्रधान बेंजामिन नेतन्याहू यांना सोमवारी संध्याकाळी जेरुसलेममधील एका रुग्णालयात दाखल करण्यात आले. पंतप्रधान कार्यालयाने जारी केलेल्या निवेदनात याची पुष्टी करण्यात आली. इस्रायलच्या वृत्तानुसार, नेतन्याहू यांना जेरुसलेममधील हदासाह ऐन केरम मेडिकल सेंटरमध्ये नेण्यात आले.

पंतप्रधान कार्यालयाने सांगितले की, ७६ वर्षीय नेतन्याहू दातांशी संबंधित उपचारांसाठी रुग्णालयात गेले होते. हिब्रू माध्यमांमध्ये त्यांना रुग्णालयात नेण्यात आल्याच्या बातम्या समोर आल्यानंतर हे निवेदन जारी करण्यात आले.गेल्या काही काळापासून नेतन्याहू यांच्या प्रकृतीचा मुद्दा इस्रायलमध्ये चर्चेचा आणि वादाचा विषय ठरला आहे. विरोधक आणि टीकाकारांनी त्यांच्या आरोग्याविषयीची माहिती जनतेपासून लपवल्याचा आरोप केला आहे. त्यामुळे त्यांच्या वास्तविक प्रकृतीबाबत देशात सातत्याने तर्कवितर्क लावले जात आहेत.

गेल्या महिन्यात नेतन्याहू यांनी सोशल मीडियावर एक सविस्तर पोस्ट शेअर करत हदासाह रुग्णालयात प्रोस्टेटमध्ये आढळलेल्या घातक ट्यूमरवर यशस्वी रेडिएशन थेरपी करण्यात आल्याचे उघड केले होते. मात्र, आजाराचे निदान कधी झाले, उपचार कधी सुरू झाले आणि कधी संपले, याबाबत त्यांनी कोणतीही माहिती दिली नव्हती.नेतन्याहू यांनी दावा केला होता की, अलीकडील युद्धादरम्यान इराण या माहितीचा इस्रायलविरोधी प्रचारासाठी वापर करू शकत होता, त्यामुळे ही माहिती सार्वजनिक करण्यात आली नव्हती.

त्यांच्या घोषणेसोबत वार्षिक आरोग्य अहवाल आणि कर्करोग उपचारासंबंधी एक अतिरिक्त दस्तऐवजही जारी करण्यात आला होता. मात्र, त्यामध्ये अत्यंत मर्यादित माहिती देण्यात आली होती. अहवालात फक्त पाच संक्षिप्त मुद्दे नमूद करण्यात आले होते आणि तो कोणत्या वर्षाचा वैद्यकीय अहवाल आहे, हेही स्पष्ट करण्यात आले नव्हते. दस्तऐवजांवर रुग्णालयाचा लोगो किंवा अधिकृत वैद्यकीय प्रमाणपत्रही नव्हते.

नेतन्याहू यांच्या आरोग्य समस्या गेल्या काही वर्षांपासून सुरू आहेत. जुलै २०२३ मध्ये त्यांच्या शरीरात पेसमेकर बसवण्यात आला होता. मार्च २०२४ मध्ये त्यांच्यावर हर्नियाची शस्त्रक्रिया करण्यात आली होती, तर डिसेंबर २०२४ मध्ये प्रोस्टेट काढण्याची शस्त्रक्रिया झाली होती.

पेसमेकर बसवण्यात आला तेव्हा सुरुवातीला त्यांना डिहायड्रेशनच्या निरीक्षणासाठी रुग्णालयात दाखल करण्यात आल्याचे सांगण्यात आले होते. मात्र, नंतर त्यांच्या शरीरात हार्ट मॉनिटरही बसवण्यात आल्याचे समोर आले. त्यानंतर एका आठवड्याने डॉक्टरांनी ईसीजी चाचणीत काही अनियमितता आढळल्याचे मान्य केले होते. तरीही त्यांनी सार्वजनिकरित्या पंतप्रधानांचे हृदय पूर्णपणे सामान्य असल्याचा दावा केला होता.

---------------

हिंदुस्थान समाचार / Priyanka Bansode