न्यू चंदीगड, 30 मे (हिं.स.) : राजस्थान रॉयल्सचे मुख्य प्रशिक्षक कुमार संगकारा यांनी इंग्लंडचा अष्टपैलू क्रिकेटपटू सॅम करनवर आयपीएल २०२६ मधून माघार घेतल्यानंतर फसवणूक केल्याचा आरोप केला आहे. त्यांनी करनच्या आयपीएल २०२६ मधून उशिरा माघार घेण्यावर प्रश्नचिन्ह उपस्थित केले आहे. त्यांनी बीसीसीआयला आवाहन केले आहे की, परदेशी क्रिकेटपटू संपूर्ण स्पर्धेदरम्यान त्यांच्या करारातील वचनबद्धतेचे पालन करतील याची खात्री करण्यासाठी कठोर नियम लागू ठेवावेत.करनने मांडीच्या दुखापतीचे कारण देत आयपीएलमधून माघार घेतली होती. पण, इंग्लंडचा हा अष्टपैलू क्रिकेटपटू आता मैदानावर परतला असून त्याने सरेसाठी तीन टी२० ब्लास्ट सामने खेळले आहेत.

क्रिकेटपटूंची उपलब्धता ही आयपीएल फ्रँचायझींसाठी नेहमीच एक आव्हान राहिली आहे. या हंगामात, दुखापतींमुळे मिचेल स्टार्क आणि पॅट कमिन्स यांना स्पर्धेच्या दुसऱ्या टप्प्यातच आपापल्या संघात सामील व्हावे लागले. पंजाब किंग्सचे सह-मालक मोहित बर्मन यांनीही क्रिकेटपटूंच्या अनुपस्थितीमुळे होणारा व्यत्यय कमी करण्यासाठी आणि संघाचा समतोल राखण्यासाठी बीसीसीआय आणि परदेशी क्रिकेट बोर्ड यांच्यात चांगल्या समन्वयाची मागणी केली आहे. लिलावात खरेदी केल्यानंतर आयपीएलमधून माघार घेणाऱ्या परदेशी क्रिकेटपटूंवर दोन वर्षांची बंदी घालण्याचा नियम बीसीसीआयकडे आधीपासूनच आहे.

दुसऱ्या क्वालिफायरमध्ये गुजरात टायटन्सकडून राजस्थानचा पराभव झाल्यानंतर, करनच्या माघारीमुळे फ्रँचायझीला त्याच्या जागी दसुन शनाकाला संधी द्यावी लागल्याने संगकाराने निराशा व्यक्त केली. पराभवानंतर झालेल्या पत्रकार परिषदेत संगकारा म्हणाला, आम्हाला सांगण्यात आले होते की सॅम करनला दुखापत झाली आहे, ज्यामुळे तो या हंगामात पुढे खेळू शकणार नाही, पण मला वाटते की मी त्याला आतापर्यंत सरेसाठी फक्त दोन-तीन सामने खेळताना पाहिले आहे, त्यामुळे हे निराशाजनक होते. तो आमच्यासाठी येथे खेळावा अशी आमची इच्छा होती, पण मला वाटते की आम्हाला आधीच माहिती दिल्यानंतर त्याच्या जागी दसुन शनाकाला संघात स्थान दिल्याबद्दल प्रत्येकाने स्वतःचा अभिमान बाळगला पाहिजे.

संगकाराने क्रिकेटपटूंच्या उपलब्धतेबाबत बीसीसीआयच्या कठोर भूमिकेचे समर्थन केले. तो म्हणाला की, एक योग्य आणि कठोर धोरण असणे नेहमीच महत्त्वाचे असते. या बाबतीत बीसीसीआयचे एक कठोर धोरण आहे. प्रत्येक क्रिकेटपटूला कधी ना कधी दुखापत होते, आणि जर दुखापत गंभीर असेल किंवा अशी असेल की खेळाडू या हंगामात पुढे खेळू शकणार नाही, तर साहजिकच हे सर्वांना समजते.

संगकारा म्हणाला की, दुखापतींचा परिणाम त्याच्या संघावरही झाला आहे. त्यांच्या संघात अॅडम मिल्ने आणि शिमरॉन हेटमायरसारखे खेळाडू आहेत. असे अनेक खेळाडू आहेत जे येथे आले, पण त्यांना खेळण्याची फारशी संधी मिळाली नाही. लुआन-ड्रे प्रिटोरियस त्यापैकीच एक आहे. क्वेना म्फाका हा असाच दुसरा खेळाडू आहे. ते येथे होते, त्यांनी कठोर परिश्रम केले, सराव केला आणि या प्रवासात संघाला साथ देण्यासाठी त्यांनी इतर कोणत्याही क्रिकेटपटूप्रमाणेच खूप मेहनत घेतली आहे. आता त्यांना यायचे आहे की नाही, हे पूर्णपणे त्या खेळाडूवर अवलंबून आहे.

संगकारा पुढे म्हणाला की, त्याला वाटते की या बाबतीत बीसीसीआयचे धोरण आता खूप कठोर आहे आणि सर्व करारात्मक जबाबदाऱ्या योग्य आणि प्रामाणिकपणे पूर्ण केल्या जातील याची खात्री करण्यासाठी ते तसेच राहिले पाहिजे. याचा फायदा प्रत्येक आयपीएल संघाला होईल.

---------------

हिंदुस्थान समाचार / वृषाली देशपांडे