मॉस्को, 07 मे (हिं.स.)।रशियाने युक्रेनने घोषित केलेल्या एकतर्फी युद्धविरामाकडे दुर्लक्ष करत रात्रभर ड्रोन हल्ले केले. युक्रेनच्या अधिकाऱ्यांनी बुधवारी सांगितले की, मध्यरात्रीपासून लागू करण्यात आलेल्या युद्धविरामानंतरही हल्ले सुरूच होते. दरम्यान, रशियाच्या संरक्षण मंत्रालयाने दावा केला की, युक्रेनने स्वतःच आपल्या युद्धविरामाचे पालन केले नाही.
रशियाच्या हवाई संरक्षण यंत्रणांनी मंगळवार संध्याकाळपासून बुधवार सकाळपर्यंत रशियन प्रदेश, क्रिमिया द्वीपकल्प आणि काळ्या समुद्राच्या परिसरात युक्रेनचे 53 ड्रोन पाडल्याचा दावा केला आहे. रशियाने नियुक्त केलेले क्रिमियाचे गव्हर्नर सर्गेई अक्स्योनोव यांनी सांगितले की, क्रिमियातील झानकोय शहरावर झालेल्या युक्रेनच्या ड्रोन हल्ल्यात पाच जणांचा मृत्यू झाला. त्यांनी मध्यरात्रीनंतर मृत्यूची माहिती दिली, तर हल्ल्याबाबतची पोस्ट त्यांनी सुमारे 90 मिनिटांपूर्वी केली होती.
मॉस्कोकडून युक्रेनच्या युद्धविरामाचे पालन होईल, असे कोणतेही संकेत मिळाले नव्हते आणि त्याची शक्यता देखील कमी मानली जात होती. कारण, रशियाने युक्रेनवर आक्रमण केल्यानंतर सुरू झालेल्या या युद्धाला आता पाच वर्षे पूर्ण होत आली आहेत.
युक्रेनचे गृहमंत्री इहोर क्लीमेंको यांनी सांगितले की, मंगळवारी रशियाने केलेल्या ड्रोन आणि क्षेपणास्त्र हल्ल्यांमध्ये 27 जणांचा मृत्यू झाला, तर 120 जण जखमी झाले. जखमी आणि मृतांमध्ये सर्वसामान्य नागरिकांचा समावेश आहे. संयुक्त राष्ट्रांच्या माहितीनुसार, या युद्धात आतापर्यंत 15 हजारांहून अधिक नागरिकांचा मृत्यू झाला आहे.दोन्ही बाजूंनी लांब पल्ल्याचे हल्ले सुरूच ठेवले आहेत. सुमारे 1,250 किलोमीटर लांबीच्या आघाडीवर रशियाचे मोठे सैन्य आणि युक्रेनची ड्रोन-आधारित संरक्षण व्यवस्था यांच्यात संथ आणि खर्चिक संघर्ष सुरू आहे.
युक्रेनचे परराष्ट्रमंत्री आंद्री सिबिहा यांनी सांगितले की, रशियन सैन्याने रात्रीभरात 108 ड्रोन आणि तीन क्षेपणास्त्रे डागली आणि हल्ले बुधवार सकाळपर्यंत सुरू होते. त्यांनी ‘एक्स’वरील पोस्टमध्ये म्हटले की, “मॉस्कोने पुन्हा एकदा संघर्ष संपवण्यासाठी करण्यात आलेल्या वास्तववादी आणि न्याय्य आवाहनाकडे दुर्लक्ष केले आहे. या आवाहनाला अनेक देश आणि आंतरराष्ट्रीय संघटनांचा पाठिंबा होता.”
रशियाने शुक्रवार आणि शनिवारी युद्धविरामाचा प्रस्ताव अशा वेळी दिला आहे, जेव्हा यापूर्वीही विशेषतः इस्टरसारख्या सणांच्या काळात अल्पकालीन युद्धविराम जाहीर करण्यात आला होता. मात्र, दोन्ही बाजूंतील खोल अविश्वासामुळे अशा युद्धविरामातून कोणताही ठोस परिणाम साध्य झालेला नाही.
युक्रेनचे राष्ट्राध्यक्ष वोलोदिमिर झेलेन्स्की यांनी एकतर्फी युद्धविरामाची घोषणा अशा वेळी केली, जेव्हा रशियाने या आठवड्याच्या शेवटी दुसऱ्या महायुद्धात नाझी जर्मनीच्या पराभवाच्या 81 व्या वर्धापनदिनानिमित्त दोन दिवसांच्या युद्धविरामाचा प्रस्ताव दिला होता. झेलेन्स्की यांनी स्पष्ट केले होते की, युद्धविरामाचे उल्लंघन झाल्यास लष्करी प्रत्युत्तर दिले जाईल. युरोपीय अधिकाऱ्यांनी युक्रेनच्या या निर्णयाचे स्वागत केले आहे.
सिबिहा यांनी म्हटले की, रशियाच्या कारवायांवरून हे स्पष्ट होते की, 9 मेच्या आसपास युद्धविरामासाठी केलेले आवाहन प्रामाणिक नाही. त्यांनी आरोप केला की, “रशियाचे राष्ट्राध्यक्ष व्लादिमिर पुतिन यांना केवळ लष्करी संचलनाची चिंता आहे, मानवी जीवांची नाही.” तसेच त्यांनी आंतरराष्ट्रीय समुदायाला मॉस्कोवर अधिक दबाव टाकण्याचे आवाहन केले.
---------------
हिंदुस्थान समाचार / Priyanka Bansode
