नवी दिल्ली, १५ जून (हिं.स.) काँग्रेसने अमेरिका आणि इराण यांच्यातील अंतरिम शांतता कराराचे स्वागत केले आहे. काँग्रेस पक्षाने म्हटले आहे की, कराराचा संपूर्ण तपशील अद्याप अधिकृतपणे जाहीर करण्यात आलेला नसला तरी, इस्रायलसह दोन्ही देश या अंतरिम कराराचे पालन करतील अशी आशा आहे. काँग्रेसचे महासचिव जयराम रमेश यांनी सांगितले की, निर्बंधांशिवाय होर्मुझची सामुद्रधुनी पुन्हा सुरू झाल्याने भारताला निश्चितच मोठा दिलासा मिळेल. तथापि, याचा अर्थ असा नाही की भारतीय अर्थव्यवस्थेसमोरील संरचनात्मक समस्या लवकरच सुटतील. त्यांनी सांगितले की, पंतप्रधान मोदींच्या इस्रायल दौऱ्यानंतर अवघ्या दोन दिवसांनी सुरू झालेल्या पश्चिम आशियातील सध्याच्या युद्धाच्या आधीपासूनच या चिंता अस्तित्वात आहेत.

ते म्हणाले की, रुपया वर्षभरापेक्षा जास्त काळापासून मोठ्या दबावाखाली आहे आणि डॉलरची मागणी व पुरवठा यातील तफावत वाढत आहे. जीडीपी वाढीचा सर्वात महत्त्वाचा निर्धारक असलेला खाजगी गुंतवणुकीचा दर अनेक वर्षांपासून मंदावला आहे. या मंदीमागे त्यांनी तीन मुख्य कारणे सांगितली: पहिले, गेल्या दशकात वास्तविक वेतनात झालेली स्थिरता. दुसरे, चीनमधून होणाऱ्या आयातीच्या डंपिंगला आळा घालण्यात सरकारला आलेल्या अपयशामुळे विक्रमी व्यापार तूट निर्माण झाली आहे आणि रोजगार निर्मिती करणाऱ्या सूक्ष्म, लघु आणि मध्यम उद्योगांच्या वाढीला धोका निर्माण झाला आहे. तिसरे, कर अधिकारी आणि तपास यंत्रणांना दिलेल्या अमर्याद अधिकारांमुळे एकूण गुंतवणुकीचे वातावरण खालावले आहे.

जागतिक धोरण आणि भू-राजकीय आघाडीवर चिंता व्यक्त करताना ते म्हणाले की, नोव्हेंबर २००८ च्या मुंबई दहशतवादी हल्ल्यानंतर भारताने ज्या पाकिस्तानला यशस्वीपणे वेगळे पाडले होते, त्याने आता नवीन प्रादेशिक आणि जागतिक प्रभाव मिळवला आहे. पाकिस्तानच्या सामरिक पायाभूत सुविधांमध्ये चीनने केलेल्या खोलवरच्या घुसखोरीमुळे भारताच्या परराष्ट्र धोरणासमोर एक गंभीर भू-राजकीय आव्हान उभे राहिले आहे.

अमेरिका आणि इराण यांच्यातील अंतरिम शांतता करारानंतर, दोन्ही देश शुक्रवारी स्वित्झर्लंडमध्ये या करारावर स्वाक्षरी करतील. अमेरिकेचे अध्यक्ष डोनाल्ड ट्रम्प यांनी इराणसोबतच्या कराराची घोषणा केली. त्यांनी होर्मुझच्या सामुद्रधुनीतील अमेरिकेची नौदल नाकेबंदी संपवण्याची घोषणाही केली. इराणचे उप परराष्ट्र मंत्री, काझेम गरीबाबादी म्हणाले की, दोन्ही पक्षांमध्ये कराराच्या अंतिम मसुद्यावर एकमत झाले आहे, ज्यामुळे आता लेबनॉनसह सर्व आघाड्यांवरील युद्ध संपुष्टात येईल

---------------

हिंदुस्थान समाचार / वृषाली देशपांडे