पॅरिस, 15 जून (हिं.स.)भारताचा अव्वल तिरंदाज, धीरज बोम्मादेवराने तिरंदाजी विश्वचषकाच्या तिसऱ्या टप्प्यात आपले पहिले वैयक्तिक सुवर्णपदक जिंकून एक अविस्मरणीय दुहेरी सुवर्णपदक पटकावले. त्याने एका रोमांचक अंतिम सामन्यात दक्षिण कोरियाच्या पॅरिस ऑलिम्पिक कांस्यपदक विजेता ली वू-सेओकचा ७-३ असा पराभव केला. त्याने कुमकुम मोहोडसोबत रिकर्व्ह मिश्र सांघिक विजेतेपदही जिंकले होते.जागतिक क्रमवारीत १८ व्या क्रमांकावर असलेल्या भारतीय लष्कराच्या या तिरंदाजाने आपला संयम राखला आणि उच्च मानांकित कोरियन खेळाडूविरुद्ध एक उल्लेखनीय कामगिरी करून आपल्या कारकिर्दीतील सर्वात महत्त्वाचा दिवस अविस्मरणीय बनवला.

धीरजने पहिले दोन सेट ३०-२९ आणि २९-२८ असे जिंकून ५-१ अशी आघाडी घेतली, तर तिसरा सेट २७-२७ असा बरोबरीत सुटला. चौथ्या सेटमध्ये लीने पुनरागमन करत दोन १० आणि एक ९ गुण मिळवून तो सेट २९-२७ असा जिंकला. धीरजला अचूक गुण मिळवता आले नाहीत, त्यामुळे पिछाडी ३-५ अशी कमी झाली. पण भारतीय खेळाडूने आपली लय गमावली नाही. ५-३ अशी आघाडी असताना, धीरजने शानदार अंतिम सेट खेळून सामना जिंकला. त्याने सलग तीन वेळा १० गुण मिळवून सुवर्णपदक पटकावले. कुमकुम मोहोडसोबत रिकर्व्ह मिश्र सांघिक सुवर्णपदक जिंकल्यानंतर काही तासांतच, धीरजने वैयक्तिक स्पर्धेत प्रवेश केला आणि अटीतटीच्या उपांत्य फेरीत जर्मनीच्या मॉरिट्झ वायझरला ६-४ ने पराभूत करून एक उल्लेखनीय पुनरागमन केले.

धीरजला पहिला सेट २६-२७ ने गमवावा लागला होता . पुढचे दोन सेट २८-२८ असे बरोबरीत सुटले, ज्यामुळे तीन सेटनंतर भारतीय तिरंदाज २-४ ने मागे पडला. धीरज स्पर्धेतून बाहेर पडण्याच्या धोक्यात होता, पण त्याने जोरदार पुनरागमन केले. त्याने सलग तीन वेळा १० गुण मिळवून चौथा सेट ३०-२७ ने जिंकला आणि स्कोअर ४-४ असा बरोबरीत आणला. निर्णायक सेटमध्ये दबावाखाली असताना, वायझरचा दुसरा बाण भरकटून ५ गुणांवर गेला. पण, धीरजने आपला संयम राखला. त्याने ९, १० आणि ९ असे स्कोर करून २८-२३ ने सेट जिंकला आणि आपले पहिले विश्वचषक अंतिम फेरीतील स्थान निश्चित केले.

---------------

हिंदुस्थान समाचार / वृषाली देशपांडे