रोम, 02 जून (हिं.स.)।इटलीच्या राष्ट्रीय भूभौतिकी आणि ज्वालामुखी विज्ञान संस्थेच्या माहितीनुसार, दक्षिण इटलीतील कॅलाब्रिया किनारपट्टीजवळ रिश्टर स्केलवर 6.1 तीव्रतेचा भूकंप झाला. स्थानिक वेळेनुसार हा भूकंप मंगळवारी पहाटे 12:12 वाजता (सोमवारी रात्री 22:12 GMT) झाला.

संस्थेने सांगितले की, भूकंपाचा केंद्रबिंदू समुद्रात सुमारे 250 किलोमीटर खोलीवर होता. या भूकंपाचे धक्के कॅलाब्रिया, सिसिली, कॅम्पानिया आणि पुगलिया यांसह दक्षिण इटलीतील अनेक भागांमध्ये जाणवले.स्थानिक माध्यमांच्या हवाल्याने दिलेल्या माहितीनुसार, सध्या कोणतीही जीवितहानी किंवा मोठ्या नुकसानाची नोंद झालेली नाही. स्थानिक प्रशासन परिस्थितीवर बारकाईने लक्ष ठेवून आहे.

इटलीमध्ये भूकंप होण्याची ही पहिलीच घटना नाही. यापूर्वी मार्च महिन्यात नेपल्सच्या किनारपट्टीजवळ 375 ते 381 किलोमीटर खोलीवर अत्यंत शक्तिशाली आणि खोलवरचा भूकंप झाला होता. भूभौतिकी तज्ज्ञांनी या भूकंपाची नोंद त्या परिसरातील गेल्या दशकातील सर्वात शक्तिशाली खोल भूस्तरीय तडा (डीप अर्थ फ्रॅक्चर) म्हणून केली होती. या घटनेमुळे त्या भागातील ज्वालामुखी प्रणालींमधून दाबाच्या लहरी वरच्या दिशेने प्रवाहित झाल्या होत्या.

यावर्षी जानेवारी महिन्यातही आयोनियन समुद्रात, इटलीच्या दक्षिण टोकापासून काही अंतरावर 5.1 तीव्रतेचा भूकंप झाला होता. या भूकंपामुळे माल्टा देशाच्या मोठ्या भागात धक्के जाणवले होते. रोमस्थित इटलीच्या राष्ट्रीय भूभौतिकी आणि ज्वालामुखी विज्ञान संस्थेने सकाळी 5:53 वाजता या भूकंपाची नोंद केली होती. त्यानंतर अवघ्या एका सेकंदात माल्टा विद्यापीठाच्या भूकंप निरीक्षण आणि संशोधन गटाच्या उपकरणांनीही हा भूकंप नोंदवला. त्या संस्थेने या भूकंपाची तीव्रता 5 असल्याचे सांगितले होते.

---------------

हिंदुस्थान समाचार / Priyanka Bansode