इस्लामाबाद, 02 जून (हिं.स.) : पाकिस्तानची राजधानी इस्लामाबादमध्ये व्यवसायांसाठी नवीन वेळापत्रक लागू करण्यात आले असून, सोमवारपासून बहुतांश व्यावसायिक आस्थापनांना रात्री ८ वाजेपर्यंत बंद करणे बंधनकारक करण्यात आले आहे. पश्चिम आशियातील सुरू असलेल्या संघर्षामुळे ऊर्जा खर्चात झालेल्या वाढीच्या पार्श्वभूमीवर हा निर्णय घेण्यात आला आहे.

उपायुक्त इरफान मेमन यांच्या नेतृत्वाखालील जिल्हा प्रशासनाने सोशल मीडियावर याबाबत घोषणा केली. नव्या नियमानुसार आठवड्यातील सर्व दिवस बाजारपेठा रात्री ८ वाजेपर्यंत बंद कराव्या लागतील. मात्र, रेस्टॉरंट्स आणि किराणा दुकाने रात्री १० वाजेपर्यंत सुरू ठेवण्यास परवानगी असेल.एक्सवरील पोस्टमध्ये प्रशासनाने म्हटले आहे की, इस्लामाबाद जिल्हा प्रशासनाने खर्च कपातीच्या उपाययोजनांचा भाग म्हणून १ जून २०२६ पासून सुधारित व्यावसायिक वेळा लागू केल्या आहेत. बाजारपेठा, दुकाने आणि शॉपिंग मॉल्स रात्री ८ वाजता बंद होतील, तर रेस्टॉरंट्स, किराणा दुकाने, बेकरी आणि इतर खाद्यपदार्थ विक्रीची आस्थापने रात्री १० वाजेपर्यंत सुरू राहू शकतील.पुढे असेही नमूद करण्यात आले आहे की, “मॅरेज हॉल, मार्की आणि इतर कार्यक्रम स्थळे देखील रात्री १० वाजता बंद करावी लागतील. औषधांची दुकाने, रुग्णालये, पेट्रोल पंप, दुग्धविक्री केंद्रे, क्रीडा सुविधा, कॉल सेंटर्स तसेच आंतरराष्ट्रीय ग्राहकांना सेवा देणाऱ्या आयटी कंपन्या यांसारख्या अत्यावश्यक सेवांना या निर्बंधांतून सूट देण्यात आली आहे.” हे निर्बंध खासगी मालमत्तांवर आयोजित कार्यक्रम आणि समारंभांनाही लागू असतील.

इराणवरील अमेरिका-इस्रायल हल्ल्यांनंतर इंधनाच्या किमतींमध्ये झालेल्या मोठ्या वाढीमुळे मार्च महिन्यात कामकाजाचे तास कमी करण्याचा निर्णय घेण्यात आला होता. वीज वापर कमी करण्यासाठी सरकारने काही कठोर उपाययोजना राबवल्या असून, त्यात दुकाने लवकर बंद करण्याचाही समावेश आहे.व्यापारी आणि व्यावसायिक संघटनांनी पारंपरिकपणे अशा उपाययोजनांना विरोध केला आहे. कारण पाकिस्तानातील बहुतांश बाजारपेठा दुपारच्या सुमारास सुरू होतात आणि उशिरापर्यंत चालू राहतात.पाकिस्तान आपल्या ऊर्जा गरजांची पूर्तता करण्यासाठी होर्मुझ सामुद्रधुनीवर मोठ्या प्रमाणावर अवलंबून आहे. सध्याच्या संकटाच्या काळात काही तेलवाहू जहाजांना मार्गक्रमणाची परवानगी देण्यात आली असली, तरी जागतिक स्तरावर ऊर्जा किमती वाढल्याने इंधनाची आयात अधिक खर्चिक ठरत आहे.

---------------

हिंदुस्थान समाचार / Priyanka Bansode