नवी दिल्ली, 24 जून (हिं.स.)। भारतातील वेगवान वितरण सेवांच्या क्षेत्रात फ्लिपकार्ट मिनिट्सने महत्त्वाचा टप्पा गाठला असून, सुरूवातीपासून दोन वर्षांपेक्षा कमी कालावधीत कंपनीने देशभरात एक हजार मायक्रो फुलफिलमेंट सेंटर्सचे जाळे उभारले आहे. ऑगस्ट २०२४ मध्ये सुरू झालेल्या या सेवेनंतर फ्लिपकार्ट मिनिट्सचे जाळे आता १३० हून अधिक शहरांमध्ये आणि ८ हजारांपेक्षा जास्त पिनकोड क्षेत्रांमध्ये पोहोचले आहे. या विस्तारामुळे ऑर्डरच्या संख्येत वार्षिक पातळीवर पाचपट वाढ नोंदवण्यात आली आहे.

फ्लिपकार्ट समूहाचे वरिष्ठ उपाध्यक्ष आणि पुरवठा साखळी, कृत्रिम बुद्धिमत्ता परिवर्तन, नवीन व्यवसाय, ग्राहक अनुभव आणि पुनर्विक्री विभाग प्रमुख हेमंत बद्री यांनी सांगितले की, एक हजार मायक्रो फुलफिलमेंट सेंटर्सचा टप्पा हा केवळ व्यवसायवाढीचा नाही, तर देशातील ग्राहक वेगवान वितरण सेवांचा मोठ्या प्रमाणावर स्वीकार करत असल्याचे द्योतक आहे. विशेषतः दुसऱ्या आणि तिसऱ्या श्रेणीतील शहरांमध्ये गेल्या वर्षाच्या तुलनेत तब्बल ४२ पट वाढ झाली असून, कंपनीने ९० नवीन शहरांचा समावेश आपल्या जाळ्यात केला आहे.

फ्लिपकार्ट मिनिट्सचे प्रमुख कुणाल गुप्ता यांच्या मते, सुरुवातीला दैनंदिन किराणा वस्तूंच्या तातडीच्या वितरणासाठी सुरू झालेली ही सेवा आता ग्राहकांच्या खरेदीच्या सवयी बदलत आहे. फळे आणि भाज्यांच्या सरासरी ऑर्डर मूल्यामध्ये ३० टक्के वाढ झाली आहे, तर पुनर्खरेदीचे प्रमाण २० टक्क्यांहून अधिक वाढले आहे. ग्राहक आता किराणा वस्तूंबरोबरच इलेक्ट्रॉनिक उत्पादने, सौंदर्यप्रसाधने, आरोग्यविषयक उत्पादने आणि जीवनशैलीशी संबंधित वस्तूंचीही मोठ्या प्रमाणावर खरेदी करत आहेत.

युवापिढी हा या व्यासपीठावरील सर्वाधिक वेगाने वाढणारा ग्राहकवर्ग ठरला असून, एकूण ग्राहकसंख्येत त्यांचा वाटा ४० टक्क्यांहून अधिक आहे. ही पिढी वेगवान वितरण सेवेकडे केवळ किराणा खरेदीचा पर्याय म्हणून नव्हे, तर त्वरित खरेदीच्या नव्या पद्धतीच्या स्वरूपात पाहत आहे. त्यामुळे या क्षेत्राची ओळख केवळ किराणा पुरवठ्यापुरती मर्यादित न राहता व्यापक किरकोळ विक्री व्यासपीठ म्हणून विकसित होत आहे.

फ्लिपकार्ट मिनिट्स सध्या सुमारे ५०० थेट ग्राहकांपर्यंत पोहोचणाऱ्या ब्रँड्ससोबत कार्यरत आहे. तसेच ‘समर्थ कृषी’ उपक्रमाद्वारे ३ हजारांहून अधिक शेतकऱ्यांना बाजारपेठेशी जोडण्यात आले आहे. याशिवाय पुरवठा, साठवणूक, संचालन आणि अंतिम टप्प्यातील वितरण क्षेत्रात मोठ्या प्रमाणावर रोजगारनिर्मिती झाली आहे.

पर्यावरणपूरक वितरणासाठी कंपनीने गेल्या वर्षभरात विद्युत वाहनांचा ताफा दुप्पट केला असून, आता १० टक्क्यांहून अधिक वितरणे हरित माध्यमांतून केली जात आहेत. पुनर्वापरयोग्य पिशव्यांचा पर्याय २० टक्के ग्राहकांनी स्वीकारला आहे. मार्ग नियोजन आणि कार्यक्षम वितरण व्यवस्थेच्या मदतीने पर्यावरणावरील परिणाम कमी करण्यासाठीही कंपनी प्रयत्नशील असल्याचे फ्लिपकार्टने स्पष्ट केले आहे.

---------------

हिंदुस्थान समाचार / Suraj Chaugule