रायगड, 26 जून (हिं.स.) : लग्नाचे आश्वासन देत प्रेमसंबंध प्रस्थापित करून एका तरुणीकडून सोन्याचे दागिने आणि 3 लाख रुपये रोख घेऊन नंतर विवाहास नकार देत आर्थिक फसवणूक केल्याची घटना कर्जत तालुक्यातील गुंडगे येथे उघडकीस आली आहे. या प्रकरणी कर्जत पोलीस ठाण्यात आरोपीविरुद्ध भारतीय न्याय संहिता (बीएनएस) अंतर्गत गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी महिला आणि गुंडगे येथील आरोपी यांच्यात प्रेमसंबंध होते. दोघांचा लवकरच विवाह होणार असल्याचे ठरले होते. याच विश्वासाचा फायदा घेत आरोपीने व्यवसाय सुरू करण्यासाठी पैशांची गरज असल्याचे सांगत फिर्यादीकडून तिच्या आईचे सुमारे दोन तोळ्यांचे लक्ष्मीहार, राणीहार, कानातले, सोन्याची चैन तसेच टप्प्याटप्प्याने 3 लाख रुपये रोख घेतले.

मात्र, दागिने आणि रोख रक्कम मिळाल्यानंतर आरोपीने विवाह करण्यास नकार दिला. तसेच, घेतलेले दागिने आणि पैसे परत करण्याची वारंवार मागणी करूनही त्याने नकार दिल्याचा आरोप फिर्यादीने आपल्या तक्रारीत केला आहे.

यानंतर पीडितेने कर्जत पोलीस ठाण्यात तक्रार दाखल केली. त्यानुसार गुन्हा क्रमांक 282/2026 नोंद करण्यात आला असून भारतीय न्याय संहिता, 2023 मधील कलम 314, 316(2) आणि 318(4) अंतर्गत आरोपीविरुद्ध गुन्हा दाखल करण्यात आला आहे.

या प्रकरणाचा पुढील तपास महिला सहाय्यक पोलीस निरीक्षक मनीषा लटपटे करीत आहेत.

---------------------

हिंदुस्थान समाचार / संदेश साळुंके (रायगड)