जेरुसलेम , 01 जुलै (हिं.स.)।इस्रायलचे पंतप्रधान बेंजामिन नेतन्याहू यांनी स्पष्ट संकेत दिले आहेत की, देशाच्या सुरक्षेला धोका निर्माण झाल्यास इस्रायल इराणवर आणखी एक लष्करी हल्ला करण्यास मागेपुढे पाहणार नाही. अमेरिका आणि इराण यांच्यातील युद्धविरामाच्या प्राथमिक आराखड्याचे व्यापक शांतता करारात रूपांतर करण्याचे प्रयत्न सुरू असतानाच त्यांनी हे विधान केले आहे. नेतन्याहू यांच्या या इशाऱ्यामुळे इराणच्या अणुकार्यक्रमाबाबत इस्रायलची भूमिका अजूनही कठोर असल्याचे स्पष्ट झाले आहे.
इस्रायलच्या माध्यमांना दिलेल्या मुलाखतीत नेतन्याहू म्हणाले की, इराणविरोधात यापूर्वी करण्यात आलेल्या लष्करी कारवायांमुळे इस्रायलला संभाव्य अणुहल्ल्याच्या धोक्यापासून संरक्षण मिळाले. ते म्हणाले, “आम्ही इराणकडून निर्माण होणाऱ्या अणुबॉम्बच्या धोक्यापासून स्वतःचे संरक्षण केले आहे आणि गरज पडल्यास तिसऱ्यांदाही तसेच करू.” त्यांनी पुन्हा एकदा ठामपणे सांगितले की, कोणत्याही परिस्थितीत इस्रायल इराणला अण्वस्त्रे मिळवू देणार नाही आणि आवश्यकता भासल्यास स्वतंत्रपणे कारवाई करेल.
नेतन्याहू यांचे हे वक्तव्य अमेरिका आणि इराण यांच्यातील तणाव कमी करण्यासाठी सुरू असलेल्या चर्चेदरम्यान आले आहे. कतारच्या मध्यस्थीने सुरू असलेल्या या वाटाघाटींचा उद्देश दोन्ही देशांतील वैर कमी करणे, निर्बंधांमध्ये टप्प्याटप्प्याने सवलत देणे, इराणच्या अणुकार्यक्रमावर विश्वासार्ह नियंत्रण व्यवस्था उभी करणे आणि मध्य पूर्वेत स्थैर्य निर्माण करणे हा आहे.वृत्तांनुसार, प्रस्तावित कराराच्या मसुद्यात लष्करी कारवाया थांबवणे, होर्मुझ सामुद्रधुनीतील वाहतूक पूर्ववत सुरू करणे, आर्थिक निर्बंधांमध्ये टप्प्याटप्प्याने शिथिलता देणे आणि इराणच्या अणुकार्यक्रमावर देखरेख ठेवण्यासाठी स्वतंत्र यंत्रणा उभारणे, अशा तरतुदींचा समावेश आहे.
इराणने पुन्हा एकदा आपला अण्वस्त्रे विकसित करण्याचा कोणताही हेतू नसल्याचे सांगितले असले, तरी या विषयावरील तांत्रिक पातळीवरील चर्चा अद्याप सुरू आहेत.मुलाखतीत नेतन्याहू यांनी स्पष्ट केले की, जर कोणताही करार इस्रायलच्या सुरक्षा चिंतांचे समाधान करू शकला नाही किंवा इराणची लष्करी अथवा अणुक्षमता कायम राहिली, तर इस्रायल स्वतःला त्या कराराने बांधील मानणार नाही. त्यामुळे भविष्यातही इस्रायल एकतर्फी लष्करी कारवाईचा पर्याय खुला ठेवणार असल्याचे संकेत मिळत आहेत.
दरम्यान, अमेरिकेचे राष्ट्राध्यक्ष डोनाल्ड ट्रम्प यांनी सार्वजनिकरित्या या प्रदेशातील तणाव वाढू नये, असे आवाहन केले आहे. ट्रम्प यांचे मत आहे की, प्रादेशिक संघर्ष टाळण्यासाठी कूटनीती हाच सर्वोत्तम मार्ग असून, तेहरानबरोबरच्या अंतिम करारावर परिणाम होईल अशी कोणतीही कृती इस्रायलने टाळली पाहिजे.
दरम्यान, या भागातील लष्करी तणाव कायम आहे. बेरूतमधील हिजबुल्लाच्या तळांवर इस्रायलने केलेल्या हल्ल्यानंतर इराणने इस्रायलवर क्षेपणास्त्रांचा मारा केला. त्याला प्रत्युत्तर म्हणून इस्रायलने इराणमधील अनेक ठिकाणांवर हल्ले केले. अमेरिकेने या कारवायांमध्ये थेट सहभाग घेतला नसला, तरी इस्रायलच्या हवाई संरक्षण व्यवस्थेला मदत केली.मंगळवारी नेतन्याहू यांनी दक्षिण लेबनानमधील इस्रायलच्या नियंत्रणाखालील भागाचा दौरा केला. यावेळी ते म्हणाले की, “जोपर्यंत हिजबुल्ला सशस्त्र आहे आणि इस्रायलसाठी धोका कायम आहे, तोपर्यंत इस्रायली सैन्य दक्षिण लेबनानमधून माघार घेणार नाही.
---------------
हिंदुस्थान समाचार / Priyanka Bansode
