इस्लामाबाद, 21 जुलै (हिं.स.)।अमेरिका आणि इराण यांच्यातील अंतरिम करार मोडल्यानंतर पाकिस्तानमध्ये चर्चेची हालचाल सुरू झाली आहे. इराणचे गृहमंत्री एस्कंदर मोमेनी यांच्या नेतृत्वाखालील एक उच्चस्तरीय शिष्टमंडळ पाकिस्तानात दाखल झाले आहे.

मोमेनी सोमवारी संध्याकाळी इस्लामाबादला पोहोचले, जिथे पाकिस्तानचे गृहमंत्री मोहसिन नक्वी यांनी त्यांचे स्वागत केले. वृत्तानुसार, इराणचे गृहमंत्री एस्कंदर मोमेनी यांनी पाकिस्तानचे लष्करप्रमुख फील्ड मार्शल आसिम मुनीर यांची भेट घेतली.ही भेट अशा वेळी होत आहे जेव्हा अमेरिका आणि इराण यांच्यातील तणाव सातत्याने उच्च पातळीवर आहे.

इराणचे गृहमंत्री एस्कंदर मोमेनी यांनी मंगळवारी, 21 जुलै रोजी इस्लामाबादमध्ये पाकिस्तानचे पंतप्रधान शहबाज शरीफ यांच्याशी चर्चा केली. या भेटीदरम्यान दोन्ही देशांमध्ये सुरक्षा आणि प्रादेशिक परिस्थितीबाबत चर्चा होण्याची अपेक्षा आहे. इस्लामाबादमध्ये पाकिस्तान आणि इराण यांच्यात झालेल्या या बैठकीनंतर अमेरिका आणि इराण पुन्हा एकदा चर्चेच्या टेबलावर समोरासमोर येऊ शकतात, अशा चर्चा रंगू लागल्या आहेत.

अमेरिका आणि इराण यांच्यात 60 दिवसांच्या युद्धविरामाचा करार झाला होता. अंतिम करार होईपर्यंत दोन्ही देशांनी एकमेकांवर हल्ले करणार नाहीत, असे त्यात ठरले होते. मात्र हा युद्धविराम एक महिना देखील टिकू शकला नाही. अमेरिका आणि इराण यांच्यातील तणाव सातत्याने वाढत असून दोन्ही देश एकमेकांवर हल्ले करत आहेत. लष्करी तळांसह महत्त्वाच्या पायाभूत सुविधांवरही दोन्ही बाजूंनी हल्ल्यांची तीव्रता वाढवली आहे.

युद्धविराम मोडल्यानंतर इराणचे उपपरराष्ट्रमंत्री काझेम गरीबाबादी यांनी म्हटले होते, “अमेरिकेने इस्लामाबाद सामंजस्य कराराअंतर्गत (एमओयू) दिलेल्या वचनांचे उल्लंघन केले आहे. त्यामुळे तेहरानदेखील आता या कराराचे पालन करणार नाही, कारण या कराराला आता काहीही अर्थ उरलेला नाही. सध्या इराणचे संपूर्ण लक्ष देशाच्या संरक्षणावर केंद्रित आहे.”दुसरीकडे, अमेरिकेनेही युद्धविरामाशी संबंधित प्रारंभिक करारातून माघार घेत आपल्या सर्व बांधिलकी स्थगित करण्याची घोषणा केली होती.

---------------

हिंदुस्थान समाचार / Priyanka Bansode