अमरावती, 23 जुलै (हिं.स.) पावसाळ्यातील साथरोगांनी डोके वर काढले असून जिल्ह्यात डेंग्यू व चिकुनगुनियाच्या रुग्णांमध्ये वाढ होऊ लागली आहे. या आजारांवर नियंत्रणासाठी आरोग्ययंत्रणा कार्यान्वित झाली असून नागरिकांनीही दक्षता बाळगण्याचे आवाहन करण्यात आले आहे. गेल्या तीन महिन्यांत डेंगीचे ११३ व चिकुनगुनियाचे ४३ पॉझिटिव्ह रुग्ण आढळले आहेत. या रुग्णांच्या संख्येत वाढ होण्याची शक्यता वर्तविण्यात आली आहे.

डेंग्यू , चिकुनगुनिया व मलेरिया, यासारख्या आजारांचा पावसाळ्यात प्रादुर्भाव वाढतो. हा प्रकोप लक्षात घेत आरोग्ययंत्रणा पावसाळ्यापूर्वीपासूनच जनजागृती करीत नागरिकांना दक्षतेचे आवाहन करते. यंदा जून व जुलैतील पावसाने सलग हजेरी लावलेली नाही. त्यामुळे कायम राहिलेल्या उष्म्यामुळे अनेकांनी कुलर्स काढलेच नाहीत. याशिवाय साचलेले पाण्याचे डबके, फुलदाणी या स्वच्छ करण्यात आलेल्या नाहीत. फवारणी व धुवारणीचेही काम झालेले नाही. परिणामतः डेंगी डासांची उत्पत्ती झाल्याचा निष्कर्ष काढण्यात आला आहे. या आजाराचे डास, अशा साठवलेल्या पाण्यात अंडी घालतात व तेथूनच त्यांची मुख्य उत्पत्ती होते, असे आरोग्ययंत्रणेने म्हटले आहे.

दरम्यान, मे ते २० जुलै या कालावधीत जिल्ह्यात डेंगीचे ११३ व चिकुनगुनियाचे ४३ रुग्ण आढळले आहेत. यातील बहुतांश रुग्ण उपचारानंतर दुरुस्त झाले असले तरी धोका मात्र कायम आहे. मे महिन्यात डेंगीचे ३४ रुग्ण आढळले होते, त्यामध्ये जून व जुलै महिन्यात वाढ झाली. जूनमध्ये ४४ व २० जुलैपर्यंत ३३ डेंगीचे पॉझिटिव्ह रुग्ण आढळले असल्याची माहिती आरोग्ययंत्रणेने दिली आहे. त्याचवेळी चिकुनगुनियाचे मेमध्ये १३, जून १६ व २० जुलैपर्यंत १४, असे एकूण ४३ रुग्ण आढळले आहेत. सद्या सर्दी, ताप, घसा दुखणे व खोकल्याच्या रुग्णांसह व्हायरल फिव्हरच्या रुग्णांची संख्या वाढत आहे. यातील काही रुग्ण डेंगी व चिकुनगुनियाचे असल्याचे तपासणी अहवालात आढळले आहे. आतापर्यंत २१ रुग्ण मलेरियाचे आहेत.

आरोग्य विभागाकडून डेंगी, चिकुनगुनिया व मलेरियाचा प्रादुर्भाव रोखण्यासाठी सर्वेक्षण, तापग्रस्त रुग्णांची तपासणी, डास अळ्यांचे निर्मूलन व फवारणी, धुवारणीसह जनजागृतीवर भर देण्यात येत आहे. शहरी भागासह ग्रामीण भागात आशासेविका व आरोग्य कर्मचारी गृहभेटी देत नागरिकांना स्वच्छतेचा संदेश देत मार्गदर्शन करीत आहेत.

-------------------

हिंदुस्थान समाचार / अरुण जोशी