ग्लासगो, २८ जुलै (हिं.स.). भारताचा स्टार उंच उडीपटू सर्वेश कुशारेने २०२६ च्या राष्ट्रकुल क्रीडा स्पर्धेत पुरुषांच्या उंच उडी प्रकारात उत्कृष्ट कामगिरी करत रौप्यपदक पटकावले. ग्लासगो क्रीडा स्पर्धेतील हे भारताचे पहिले ॲथलेटिक्स पदक ठरले.
३१ वर्षीय सर्वेशने अंतिम फेरीत आपल्या पहिल्याच प्रयत्नात २.०५ मीटर, २.१० मीटर, २.१५ मीटर आणि २.२० मीटरची उंची यशस्वीरित्या पार केली. त्यानंतर त्याने आपल्या तिसऱ्या प्रयत्नात २.२५ मीटरची उंची पार करून रौप्यपदक जवळपास निश्चित केले.
जमैकाच्या रोमेन बेकफोर्डनेही २.२५ मीटरची उंची पार केली, पण ती केवळ त्याच्या पहिल्याच प्रयत्नात. यामुळे त्याला सुवर्णपदक मिळाले. त्यानंतर दोन्ही खेळाडू तिन्ही प्रयत्नांत २.२८ मीटरची उंची पार करू शकले नाहीत. इंग्लंडच्या किमानी जॅकने २.२० मीटरच्या उडीसह कांस्यपदक जिंकले. सर्वेश कुशारे उत्कृष्ट फॉर्ममध्ये राष्ट्रकुल क्रीडा स्पर्धेत दाखल झाला. त्याने २७ जून रोजी भुवनेश्वर येथे झालेल्या राष्ट्रीय आंतरराज्यीय ॲथलेटिक्स चॅम्पियनशिपमध्ये २.३१ मीटरची उडी मारून एक नवीन राष्ट्रीय विक्रम प्रस्थापित केला होता. तसेच, २०२५ च्या जागतिक ॲथलेटिक्स चॅम्पियनशिपमध्ये पुरुषांच्या उंच उडीच्या अंतिम फेरीत पोहोचणारा तो पहिला भारतीय ठरून त्याने इतिहास रचला, जिथे तो सहाव्या स्थानावर राहिला.
या स्पर्धेच्या अंतिम फेरीत भारताचे तीन खेळाडू सहभागी झाले होते. पण २.०५ मीटरची सुरुवातीची उंची पार करण्यात अपयशी ठरल्यानंतर तेजस्विन शंकर दुखापतीमुळे स्पर्धेतून बाहेर पडला. असे असूनही, बर्मिंगहॅम २०२२ चा कांस्यपदक विजेता तेजस्विन संपूर्ण स्पर्धेदरम्यान बाजूला उभा राहून सर्वेशला प्रोत्साहन देत होता. आणखी एक भारतीय खेळाडू, जे. आदर्श राम, हा देखील अंतिम फेरीत होता.सर्वेश कुशारेने मिळवलेल्या या रौप्य पदकामुळे भारताने ग्लासगो राष्ट्रकुल क्रीडा स्पर्धा २०२६ मध्ये ॲथलेटिक्समधील आपल्या पदकांचे खाते उघडले असून, भारतीय संघाच्या पदक जिंकण्याच्या आशांना नवी चालना मिळाली आहे.
---------------
हिंदुस्थान समाचार / वृषाली देशपांडे
