मुंबई, 20 ऑगस्ट (हिं.स.)। ऑयस्टर रिन्यूएबलने कच्छ केमिकल इंडस्ट्रीज लिमिटेडसोबत गुजरात राज्यात कॅप्टिव्ह संरचनेअंतर्गत 25.2 MW पवन आणि 27.72 MWp सौर ऊर्जेचा समावेश असलेल्या 25.2 MW क्षमतेच्या पवन-सौर हायब्रिड चोवीस तास (राउंड द क्लॉक RTC) अक्षय ऊर्जा पुरवठ्यासाठी दोन्ही पक्षांना मान्य व बंधनकारक असलेल्या प्रमुख करार आणि अटीपत्रावर स्वाक्षरी केली आहे. गुजरातमधील ऑयस्टर रिन्यूएबलचा हा तिसरा प्रकल्प असून, कंपनीच्या अक्षय ऊर्जा पोर्टफोलिओमध्ये महत्त्वाची बाजारपेठ म्हणून गुजरातचे स्थान यामुळे अधिक दृढ झाले आहे.

कच्छ केमिकलच्या कामकाजासाठी स्थिर आणि चोवीस तास स्वच्छ वीज उपलब्ध करून देण्याच्या दृष्टीने या प्रकल्पाची रचना करण्यात आली आहे.

हा प्रकल्प कार्यान्वित झाल्यानंतर, हायब्रिड सौर-पवन प्रकल्पातून दरवर्षी 1,08,000 MWh पेक्षा अधिक स्वच्छ वीजनिर्मिती होण्याचा अंदाज आहे. यामुळे दरवर्षी सुमारे 85,000 टन कार्बनडाय ऑक्साईड उत्सर्जन कमी होण्यास मदत होईल.

कॅप्टिव्ह मॉडेलअंतर्गत स्थिर आणि चोवीस तास अक्षय ऊर्जेची गुजरातमधील औद्योगिक क्षेत्राकडून वाढती मागणी या करारातून अधोरेखित होते. उत्पादक कंपन्या ऊर्जेच्या खर्चातील जोखीम कमी करण्यासोबतच त्याच वेळी शाश्वततेशी संबंधित आपली बांधिलकी पूर्ण करण्याच्या दिशेने प्रयत्नशील आहेत.

ऑयस्टर रिन्यूएबलचे व्यवस्थापकीय संचालक आणि मुख्य कार्यकारी अधिकारी सिद्धार्थ भाटिया म्हणाले, “गुजरात आमच्या विकासाच्या प्रवासातील एक महत्त्वाची बाजारपेठ आहे आणि राज्यातील हा आमचा तिसरा प्रकल्प या प्रदेशाप्रती असलेली आमची दीर्घकालीन वचनबद्धता दर्शवतो. कच्छ केमिकलसोबतची आमची भागीदारी 25.2 MW क्षमतेची चोवीस तास सौर-पवन वीज ऊर्जा उपलब्ध करून देईल. यामुळे दरवर्षी जवळपास 85,000 टन कार्बनडाय ऑक्साईड उत्सर्जन टाळण्यास मदत होईल, तसेच कॅप्टिव्ह हायब्रिड वीज व्यवस्थेकडून अपेक्षित असलेली विश्वासार्हता त्यांना मिळेल.

या करारासह ऑयस्टर रिन्यूएबल गुजरातमधील आपल्या राउंड द क्लॉक अक्षय ऊर्जा पोर्टफोलिओला अधिक बळकट करत आहे आणि राज्यातील वाढत्या औद्योगिक व उत्पादन क्षेत्रात आपले स्थान विस्तारण्याच्या बांधिलकीवर ठाम आहे.

---------------

हिंदुस्थान समाचार / हर्षदा गावकर