चेन्नई, 24 ऑगस्ट (हिं.स.) । तामिळनाडूचे मुख्यमंत्री सी. जोसेफ विजय यांनी सोमवारी घोषणा केली की, नवीन अन्नपूर्णा सुपर 6 योजनेअंतर्गत जानेवारी महिन्यात येणाऱ्या पोंगल सणापासून कुटुंबप्रमुख महिलांना दरवर्षी तीन मोफत एलपीजी सिलिंडर दिले जातील. या प्रमुख कल्याणकारी कार्यक्रमासाठी दरवर्षी अंदाजे ४ हजार कोटी रुपये खर्च येईल. थेट लाभ हस्तांतरण (डीबीटी ) प्रणालीद्वारे राज्यभरातील १.३ कोटींहून अधिक पात्र कुटुंबांना याचा लाभ मिळेल.

विधानसभेत मुख्यमंत्र्यांनी सांगितले की, या योजनेत २.५ लाख रुपयांपेक्षा जास्त वार्षिक उत्पन्न नसलेली कुटुंबे, तसेच आर्थिकदृष्ट्या दुर्बळ घटक, लहान व अल्पभूधारक शेतकरी आणि दिव्यांग व्यक्तींच्या कुटुंबांचा समावेश असेल. स्वयंपाकाच्या गॅस सिलिंडरची किंमत, बुकिंग आणि डिलिव्हरीनंतर तेल विपणन कंपन्यांच्या अधिकृत बिलाच्या आधारे परत केली जाईल आणि थेट महिला कुटुंबप्रमुखाच्या बँक खात्यात जमा केली जाईल.मदत उपाययोजनांची गरज निर्माण करणाऱ्या आर्थिक आव्हानांचा संदर्भ देत मुख्यमंत्री म्हणाले की, आखाती प्रदेशातील संघर्षांमुळे जागतिक पुरवठ्यात झालेला व्यत्यय आणि वाढलेल्या किमतींमुळे गेल्या चार महिन्यांपासून कुटुंबांवर मोठा आर्थिक भार पडला आहे, ज्यामुळे अनेकांना पर्यायी इंधनाकडे वळण्यास भाग पडले आहे.

मुख्यमंत्री म्हणाले, आर्थिक अडचणी असूनही, जनतेवरील आर्थिक भार कमी करण्यासाठी, त्यांच्या कल्याणाचे रक्षण करण्यासाठी आणि त्यांना दिलेले वचन पूर्ण करण्यासाठी आमच्या सरकारने गॅस सिलेंडर अनुदान देण्याचा निर्णय घेतला आहे. त्यामुळे, कुटुंबप्रमुख महिलांना लाभ मिळावा यासाठी, पहिल्या टप्प्यात अन्नपूर्णा सुपर ६ योजनेअंतर्गत दरवर्षी तीन मोफत गॅस सिलेंडर दिले जातील. तयारी सुरू झाली असून, या योजनेची अंमलबजावणी जानेवारी महिन्यातील पोंगल सणापासून सुरू केली जाईल, ज्यासाठी अंदाजे ४ हजार कोटी रुपयांची वार्षिक तरतूद करण्यात आली आहे.

महिला सक्षमीकरणाप्रती सरकारच्या वचनबद्धतेचा पुनरुच्चार करत, मुख्यमंत्री म्हणाले की, राज्यभरातील महिलांची सुरक्षा, सामाजिक प्रगती आणि उपजीविकेची सुरक्षा सुनिश्चित करण्यासाठी सिंगा पेन विशेष कृती दल, थैमामन थंगामोथिराम, वेट्री मगलिर अडुगल वलारप्पू आणि अन्नानिन सीर यांसारख्या अनेक विशेष योजनांसाठी आवश्यक निधी आधीच मंजूर करण्यात आला आहे. सामाजिक सुरक्षा आणि गतिशीलता अधिक मजबूत करण्यासाठी, मुख्यमंत्र्यांनी वेट्री पयानम योजनेची घोषणा केली. ही योजना महात्मा गांधींच्या जयंतीनिमित्त २ ऑक्टोबरपासून महिला आणि तृतीयपंथी प्रवाशांसाठी मोफत बस प्रवासाची व्याप्ती लक्षणीयरीत्या वाढवते.या विस्तारित वाहतूक योजनेअंतर्गत, महिला आणि तृतीयपंथी व्यक्ती महानगर आणि शहरी भागांमध्ये धावणाऱ्या एक्सप्रेस, मर्यादित थांबा सेवा (एलएसएस) आणि डिलक्स सरकारी बसमधून मोफत प्रवास करू शकतील.

आंतर-जिल्हा गतिशीलता सुधारण्यासाठी, ही सुविधा ग्रामीण आणि डोंगराळ भागांमध्ये धावणाऱ्या नियमित भाड्याच्या बसमध्येही उपलब्ध असेल. वेट्री पयानम योजनेच्या अंमलबजावणीसाठी राज्य तिजोरीवर दरवर्षी अंदाजे ६ हजार कोटी रुपयांचा भार पडेल. सरकारने हेही स्पष्ट केले आहे की, ही योजना कोणत्याही उत्पन्न मर्यादेशिवाय किंवा फेऱ्यांच्या संख्येवर निर्बंध न ठेवता राबवली जाईल.

---------------

हिंदुस्थान समाचार / वृषाली देशपांडे