मुंबई, 28 ऑगस्ट (हिं.स.)। 'नॅचरल स्टार' नानीचा बहुप्रतिक्षित चित्रपट 'द पॅराडाईज' सध्या सतत चर्चेत आहे. श्रीकांत ओडेला दिग्दर्शित या चित्रपटातील 'आया शेर' (Aaya Sher) या पहिल्या गाण्याला प्रेक्षकांचा प्रचंड प्रतिसाद मिळाला आहे. आता या चित्रपटातील दुसरे आणि विशेष गाणे प्रदर्शित होण्यासाठी सज्ज झाले असून, यात नानीसोबत अभिनेत्री कीर्ती सुरेश झळकणार आहे. या गाण्याला अनिरुद्ध रविचंदरने संगीत दिले आहे, तर राष्ट्रीय पुरस्कार विजेते कसारला श्याम यांनी याचे बोल लिहिले आहेत.

कीर्ती सुरेशने सोशल मीडियावर या गाण्याच्या सेटवरील नानीसोबतचा एक फोटो शेअर केला आहे. या फोटोमध्ये ती नानीची 'पोनीटेल' (केसांची बट) धरताना दिसत आहे. तिने यासोबत एक मजेशीर कॅप्शनही दिले आहे: जेव्हा तुम्ही त्याच्या केसांना स्पर्श करता, तेव्हा तो संतापतो. अभिनेत्रीच्या या पोस्टमुळे चाहत्यांची उत्सुकता आणखी वाढली आहे. मात्र, तिच्या भूमिकेबद्दल आणि गाण्याच्या कथानकाबद्दल अद्याप कोणतीही माहिती उघड करण्यात आलेली नाही. दरम्यान, या चित्रपटातील 'आया शेर' या गाण्याने यूट्यूबवर २०० दशलक्षाहून अधिक व्ह्यूज मिळवले आहेत आणि त्यातील 'हुक स्टेप' सोशल मीडियावर चांगलीच गाजत आहे.

एसएलव्ही (SLV) सिनेमाजच्या बॅनरखाली निर्मित 'द पॅराडाईज' हा चित्रपट २४ सप्टेंबर रोजी चित्रपटगृहांमध्ये प्रदर्शित होणार आहे. या चित्रपटात नानी मुख्य भूमिकेत असून, तो हिंदी, तेलगू, तमिळ, इंग्रजी, स्पॅनिश, बंगाली, कन्नड आणि मल्याळम अशा आठ भाषांमध्ये प्रदर्शित केला जाणार आहे. चित्रपटाची जागतिक पातळीवरील भव्यता पाहता, आंतरराष्ट्रीय बाजारपेठेत हा चित्रपट सादर करण्यासाठी निर्मात्यांनी हॉलिवूड अभिनेता रायन रेनॉल्ड्सशीही संपर्क साधल्याचे वृत्त आहे.

---------------

हिंदुस्थान समाचार / हर्षदा गावकर