मुंबई, 28 ऑगस्ट, (हिं.स.)। कन्नड सुपरस्टार यशचा बहुप्रतिक्षित चित्रपट 'टॉक्सिक' २६ ऑगस्ट रोजी चित्रपटगृहांमध्ये प्रदर्शित झाला. गीतू मोहनदास दिग्दर्शित या ॲक्शन-थ्रिलर चित्रपटाने प्रदर्शनाच्या पहिल्याच दिवशी १०१.१० कोटी रुपयांची (निव्वळ) नेत्रदीपक कमाई करून अनेक मोठ्या चित्रपटांचे विक्रम मोडले. मात्र, दुसऱ्या दिवशी चित्रपटाच्या कमाईत मोठी घट दिसून आली. 'सॅकनिल्क'च्या (Sacnilk) अहवालानुसार, 'टॉक्सिक'ने प्रदर्शनाच्या दुसऱ्या दिवशी ३७.६५ कोटी रुपयांची कमाई केली. यासह, भारतातील चित्रपटाची एकूण निव्वळ कमाई १३८.७५ कोटी रुपयांवर पोहोचली आहे. यापैकी २४.२५ कोटी रुपये हिंदी आवृत्तीतून, तर १३.४० कोटी रुपये इतर भाषांमधून मिळाले आहेत. चित्रपटाची आतापर्यंतची जगभरातील एकूण (ग्रॉस) कमाई १९०.१० कोटी रुपये असल्याचे सांगण्यात येत आहे.

इम्रान हाश्मीचा 'आवारापन २' देखील बॉक्स ऑफिसवर आपली पकड टिकवून आहे. १४ ऑगस्ट रोजी प्रदर्शित झालेल्या या चित्रपटाचा वेग जरी मंदावला असला, तरीही तो कमाई करत आहे. अहवालांनुसार, चित्रपटाने १३ व्या दिवशी ९० लाख रुपयांचा व्यवसाय केला होता, तर १४ व्या दिवशी ६० लाख रुपयांचा व्यवसाय केला. भारतातील चित्रपटाची एकूण निव्वळ कमाई १४४.२५ कोटी रुपये झाली आहे, तर जगभरात त्याने २०३.७० कोटी रुपयांचा टप्पा ओलांडला आहे.

यशच्या 'टॉक्सिक'मध्ये कियारा अडवाणी, नयनतारा आणि तारा सुतारिया यांच्यासह अनेक कलाकार महत्त्वाच्या भूमिकेत आहेत. दुसरीकडे, 'आवारापन २' मध्ये इम्रान हाश्मीसोबत दिशा पटानी आणि शबाना आझमी यांच्या भूमिका आहेत. जरी 'टॉक्सिक'ने दुसऱ्या दिवशी पहिल्या दिवसाच्या कमाईच्या निम्म्याहून कमी कमाई केली असली, तरी दोन दिवसांत १३८ कोटी रुपयांहून अधिकचा निव्वळ व्यवसाय ही चित्रपटासाठी एक दमदार सुरुवात मानली जात आहे.

---------------

हिंदुस्थान समाचार / हर्षदा गावकर