काठमांडू, २९ ऑगस्ट (हिं.स.) भोटेकोशी नदीला आलेल्या पुरामुळे रसुवा जिल्ह्यातील जलविद्युत प्रकल्पांच्या बोगद्यांमध्ये अडकलेल्या कामगारांना वाचवण्यासाठी आणि मदतकार्यात साहाय्य करण्यासाठी भारताने नेपाळमध्ये एक विशेष तांत्रिक पथक पाठवले आहे. या पथकासोबत आवश्यक तांत्रिक उपकरणे आणि मदत साहित्यही नेपाळला पोहोचवण्यात आले.

भारताने पाठवलेले पथक आणि तांत्रिक साहित्य काठमांडूला पोहोचल्यानंतर, भारतीय दूतावासाने ते नेपाळ सरकारकडे सुपूर्द केले. नेपाळ सरकारच्या विनंतीनुसार भारताने हे तज्ज्ञ पथक आणि आवश्यक उपकरणे पाठवली होती.

भोटेकोशी नदीला आलेल्या पुरामुळे, रसुवाच्या विविध भागांतील जलविद्युत प्रकल्पांच्या बोगद्यांमध्ये अडकलेल्या कामगारांपर्यंत पोहोचून त्यांना सुरक्षितपणे बाहेर काढण्यात मदत आणि बचाव पथकांना अडचणी येत आहेत. ही परिस्थिती लक्षात घेऊन नेपाळने भारताकडे तांत्रिक मदतीची मागणी केली होती.

भारताने पाठवलेले पथक बोगद्यांमधील बचाव कार्यासाठी आवश्यक असलेले तांत्रिक कौशल्य आणि उपकरणांसह नेपाळमध्ये दाखल झाले आहे. नेपाळला अंदाजे १० टन मदत साहित्यही पाठवण्यात आले आहे. या साहित्याचा उपयोग पूरग्रस्त भागांमधील मदतकार्यासाठी केला जाईल.

भारताने यापूर्वी दोनदा नेपाळला मदत साहित्य घेऊन जाणारी विमाने पाठवली आहेत. आतापर्यंत नेपाळला एकूण ५७.५ टन मदत साहित्य पोहोचवण्यात आले आहे.

भारताकडून सुरू असलेल्या मदत साहित्य आणि तांत्रिक मदतीचा उद्देश पूरग्रस्त भागांमधील मदत आणि बचाव कार्याला गती देणे, तसेच संकटात सापडलेल्यांना मदत करणे हा आहे.

---------------

हिंदुस्थान समाचार / वृषाली देशपांडे