- मृतांचा आकडा 734 वर

काठमांडू , 30 ऑगस्ट (हिं.स.)। नेपाळमध्ये अचानक आलेल्या महापुरानंतर मदत आणि बचावकार्य सुरू असताना आतापर्यंत 734 मृतदेह सापडले आहेत. यातील बहुतांश मृतदेहांची ओळख पटलेली नसल्याने अंत्यसंस्कार करता येत नाहीत. त्यामुळे मृतदेह कुजण्यास सुरुवात झाली असून, वेगाने कुजणाऱ्या मृतदेहांमधून येणाऱ्या दुर्गंधीमुळे आता बाधित भागांमध्ये साथीचे आजार पसरण्याचा गंभीर धोका निर्माण झाला आहे. दरम्यान, नेपाळ सरकार ओळख पटलेली नसलेल्या मृतदेहांवर अंत्यसंस्कार करण्याच्या तयारीत आहे. प्रत्येक अनोळखी मृतदेहाचा डीएनए नमुना जतन करून ठेवला जाणार आहे.

नेपाळमध्ये बुधवारी आलेल्या विनाशकारी पुरानंतर मदत आणि बचावकार्य सातत्याने सुरू आहे. सुरक्षा कर्मचारी बेपत्ता लोकांचा शोध घेत आहेत. मात्र, या काळात बाधित भागांतून मोठ्या संख्येने मृतदेह सापडत असल्याने संसर्ग आणि साथीचे आजार मोठ्या प्रमाणावर पसरण्याचा गंभीर धोका निर्माण झाला आहे.केवळ चितवन जिल्ह्यात आतापर्यंत १७८ मृतदेह सापडले आहेत. त्यामध्ये ७४ पुरुष, ४१ महिला आणि ८ मुलांचा समावेश आहे. या ८ मुलांमध्ये ६ मुले आणि २ मुली आहेत. चितवनचे मुख्य जिल्हाधिकारी गणेश आर्यल यांनी सांगितले की, सतत सुरू असलेल्या शोधमोहीमांदरम्यान मृतदेहांची सुरक्षित विल्हेवाट लावणे ही प्रशासनासमोरील मोठी आव्हानात्मक बाब बनली आहे.

चितवनमधील रुग्णालयात मृतदेह ठेवण्यासाठी जागा उपलब्ध नसल्याने ते एका सरकारी कार्यालयात ठेवण्यात आले आहेत. गुरुवारी सापडलेले बहुतांश मृतदेह वेगाने कुजण्याच्या अवस्थेत पोहोचले आहेत. ज्या खोलीत ओळख पटवण्यासाठी मृतदेह ठेवण्यात आले आहेत, त्या ठिकाणाहून दुर्गंधी येऊ लागली आहे. त्यामुळे परिसरात साथीचे आजार पसरण्याची भीती व्यक्त केली जात आहे. साथीच्या आजारांचा हा संभाव्य धोका टाळण्यासाठी आणि मृतदेहांची तातडीने व योग्य पद्धतीने विल्हेवाट लावण्यासाठी जिल्हा प्रशासन आता केंद्र सरकारशी समन्वय साधून पुढील कार्यवाही करत आहे.

कुजणाऱ्या मृतदेहांमधून साथीचे आजार पसरण्याचा धोका टाळण्यासाठी नेपाळचे गृह मंत्रालय संबंधित जिल्ह्यांच्या समन्वयाने मृतदेहांच्या तातडीने व्यवस्थापनाची रणनीती तयार करत आहे.गृह मंत्रालयाच्या उपप्रवक्त्या रमा आचार्य सुबेदी यांच्या माहितीनुसार, रसुवा, नुवाकोट, धाडिंग, गोरखा, चितवन आणि नवलपरासी यांसारख्या बाधित जिल्ह्यांमध्ये सातत्याने मृतदेह सापडत आहेत. मृतदेहांवर अंत्यसंस्कार आणि त्यांचे व्यवस्थापन स्थानिक पातळीवरच करायचे की त्यांना काठमांडू येथील केंद्रात आणायचे, यावर सरकार विचार करत आहे, जेणेकरून ही प्रक्रिया जलदगतीने पूर्ण करता येईल.

महामारीविज्ञान आणि रोग नियंत्रण विभागाने मर्यादित संसाधनांमुळे साथीचे आजार पसरण्याची शक्यता व्यक्त केली आहे. विभागाचे संचालक डॉ. अनुज भट्टाचन यांनी सांगितले की, मृतदेहांची ओळख पटेपर्यंत ते कोल्ड स्टोरेजमध्ये ठेवणे अत्यंत आवश्यक आहे. मात्र, अचानक मोठ्या संख्येने मृतदेह येत असल्याने सध्याची रेफ्रिजरेशन क्षमता अपुरी पडत आहे.ही समस्या सोडवण्यासाठी धाडिंगमध्ये सापडलेले मृतदेह काठमांडू आणि पोखरा येथे हलवण्यात आले आहेत, जेणेकरून त्यांची योग्य प्रकारे देखभाल करता येईल आणि परिसरात आजारांचा प्रसार रोखता येईल.

---------------

हिंदुस्थान समाचार / Priyanka Bansode