कीव, 05 ऑगस्ट (हिं.स.)। रशिया आणि युक्रेनमधील सुरू असलेल्या युद्धाने पुन्हा एकदा भीषण वळण घेतले आहे. बुधवारी पहाटे रशियाने युक्रेनची राजधानी कीव आणि आसपासच्या भागांवर क्षेपणास्त्रे तसेच ड्रोनद्वारे जोरदार हल्ले केले. या हल्ल्यात 17 जणांचा मृत्यू झाला, तर 44 जण जखमी झाले आहेत.
युक्रेनचे राष्ट्राध्यक्ष वोलोदिमिर झेलेन्स्की यांनी सांगितले की, अत्याधुनिक हवाई संरक्षण क्षेपणास्त्र प्रणाली वेळेत मिळाली असती, तर अनेकांचे प्राण वाचू शकले असते. दरम्यान, युक्रेननेही प्रत्युत्तरादाखल रशियाच्या हद्दीत ड्रोन हल्ले केले आहेत.
रशियाने या कारवाईत बॅलिस्टिक क्षेपणास्त्रे, इतर प्रकारची क्षेपणास्त्रे आणि मोठ्या प्रमाणावर ड्रोनचा वापर केला. युक्रेनच्या अधिकाऱ्यांच्या माहितीनुसार, या हल्ल्याचे मुख्य लक्ष्य कीव्ह परिसर होता. दुसरीकडे, रशियाने आपण केवळ लष्करी कारवायांशी संबंधित ठिकाणांनाच लक्ष्य केल्याचा दावा केला आहे. दोन्ही देशांचे दावे परस्परविरोधी असून त्यांची स्वतंत्रपणे पुष्टी झालेली नाही.
झेलेन्स्की यांनी आरोप केला की, रशियाने गोदामे, रेल्वे स्थानके, पायाभूत सुविधा आणि नागरी लॉजिस्टिक केंद्रांवर हल्ले केले, ज्यांचा युद्धाशी कोणताही संबंध नव्हता. त्यांच्या म्हणण्यानुसार, एका ब्रूअरी कंपनीसह बांधकाम साहित्याच्या गोदामांचे आणि इतर नागरी सुविधांचेही मोठे नुकसान झाले आहे. युक्रेनची सर्वात मोठी खासगी टपाल सेवा ‘नोव्हा पोश्टा’नेही आपल्या एका सॉर्टिंग सेंटरचा क्लस्टर शस्त्रास्त्रांच्या हल्ल्यात पूर्णपणे नाश झाल्याची माहिती दिली.झेलेन्स्की यांनी सहयोगी देशांना बॅलिस्टिक क्षेपणास्त्रविरोधी संरक्षण प्रणाली आणि इंटरसेप्टर क्षेपणास्त्रांचा पुरवठा तातडीने वाढवण्याचे आवाहन केले आहे.
रशियाच्या संरक्षण मंत्रालयाने मात्र, आपल्या हल्ल्यांचे लक्ष्य केवळ युद्धाशी संबंधित वाहतूक, लॉजिस्टिक आणि वितरण केंद्रे असल्याचे म्हटले आहे. मंत्रालयाच्या दाव्यानुसार, कीव परिसरातील अनेक केंद्रांमध्ये ड्रोन, इलेक्ट्रॉनिक युद्ध प्रणाली आणि इतर लष्करी साहित्य साठवण्यात आले होते.रशियाने आणखी एक दावा करत ओडेसाच्या दक्षिणेकडील काळ्या समुद्रात तीन मालवाहू जहाजांवर हल्ला केल्याचे सांगितले. या जहाजांद्वारे युक्रेनच्या सैन्यासाठी शस्त्रास्त्रे आणि लष्करी उपकरणे नेली जात असल्याचा दावा रशियाने केला आहे. युक्रेनने मात्र या दाव्यावर कोणतीही प्रतिक्रिया दिलेली नाही.दरम्यान, युक्रेनने रशियाच्या अंतर्गत भागात लांब पल्ल्याचे ड्रोन हल्ले सुरूच ठेवले आहेत. युक्रेनच्या ड्रोनने मॉस्कोच्या दक्षिणेकडील तुला प्रदेशातील रशियातील मोठी ऑनलाइन रिटेल कंपनी ‘वाइल्डबेरीज’च्या गोदामाला लक्ष्य केले. युक्रेनच्या म्हणण्यानुसार, या कंपनीच्या सुविधांचा वापर लष्करी गरजांसाठीही केला जात होता.
रशियाच्या संरक्षण मंत्रालयाने दावा केला की, त्यांच्या हवाई संरक्षण यंत्रणेने रात्रीभरात 16 प्रदेश, क्रिमिया तसेच अझोव्ह आणि काळ्या समुद्रावरील हवाई क्षेत्रात युक्रेनचे एकूण 475 ड्रोन पाडले.अमेरिकेच्या पुढाकाराने सुरू असलेल्या शांतता प्रयत्नांना अद्याप यश आलेले नाही. राष्ट्राध्यक्ष झेलेन्स्की यांनी कोणत्याही अटींशिवाय युद्धविरामास सहमती दर्शवली असली, तरी रशियाचे राष्ट्राध्यक्ष व्लादिमिर पुतिन यांनी अद्याप त्यास मंजुरी दिलेली नाही. परिणामी, दोन्ही देशांकडून क्षेपणास्त्र आणि ड्रोन हल्ल्यांची तीव्रता सातत्याने वाढत आहे.तज्ज्ञांच्या मते, हे युद्ध आता अशा टप्प्यावर पोहोचले आहे की, दोन्ही बाजू एकमेकांच्या लष्करी आणि लॉजिस्टिक पायाभूत सुविधांना सातत्याने लक्ष्य करत आहेत. त्यामुळे या संघर्षाचा सर्वाधिक फटका सामान्य नागरिकांना बसत आहे.
---------------
हिंदुस्थान समाचार / Priyanka Bansode
