तेहरान, 20 सप्टेंबर (हिं.स.)।इराणने अण्वस्त्र प्रसारबंदी करार अर्थात एनपीटीमधून बाहेर पडण्याबाबत अद्याप कोणताही निर्णय घेतलेला नाही. इराणच्या एका वरिष्ठ सुरक्षा अधिकाऱ्याने सांगितले की, या मुद्द्यावर कोणताही निर्णय अमेरिकेच्या वर्तनावर अवलंबून असेल.

इराणच्या सुप्रीम नॅशनल सिक्युरिटी कौन्सिलचे सचिव मोहसिन रेजाई यांनी शनिवारी एका मुलाखतीत सांगितले की, त्यांचा देश दिवंगत सर्वोच्च नेते अली खामेनेई यांनी जारी केलेल्या त्या धार्मिक आदेशाचे अद्याप पालन करत आहे, ज्यामध्ये अण्वस्त्रे विकसित करण्यास मनाई करण्यात आली आहे. मोहसिन रेजाई म्हणाले, “मात्र, भविष्यात काय होईल, हे आम्हाला माहीत नाही.”

रेजाई यांनी यावर भर दिला की, युद्ध संपवण्यासाठी इराणने मांडलेल्या अटी स्वीकारणे वॉशिंग्टनच्या हिताचे आहे. या अटींमध्ये सर्व आघाड्यांवरील लष्करी कारवाया थांबवणे, इराणची जप्त केलेली मालमत्ता मुक्त करणे आणि इराणविरोधातील समुद्री नाकेबंदी हटवणे यांचा समावेश आहे.वृत्तानुसार, रेजाई यांनी सांगितले की कतार आणि पाकिस्तानच्या मध्यस्थांमार्फत चर्चा सुरू आहे.इराणने अमेरिकेसोबत चर्चा सुरू करण्यासाठीच्या आपल्या अटी मध्यस्थांना कळवल्या आहेत.

दरम्यान, अमेरिकेचे राष्ट्राध्यक्ष डोनाल्ड ट्रम्प पुढील आठवड्यात संयुक्त राष्ट्रांमधील आपल्या राजनैतिक हालचालींच्या केंद्रस्थानी इराणचा अणुकार्यक्रम ठेवणार आहेत. न्यूयॉर्कमध्ये आखाती देशांच्या नेत्यांसोबत त्यांची चर्चा प्रस्तावित आहे. अमेरिकन अधिकाऱ्यांनी तेहरानसोबत व्यवसाय करणाऱ्या संस्थांविरोधात पुढील कारवाईचे संकेतही दिले आहेत.

ट्रम्प मंगळवारी संयुक्त राष्ट्र महासभेला संबोधित करणार आहेत. त्यानंतर ते न्यूयॉर्कमध्ये गल्फ कोऑपरेशन कौन्सिलच्या (जीसीसी) नेत्यांची भेट घेणार आहेत. अमेरिकन अधिकाऱ्यांच्या म्हणण्यानुसार, या चर्चेत इराण हा प्रमुख विषय असेल. मात्र, ट्रम्प किंवा अमेरिकेचा अन्य कोणता प्रतिनिधी इराणच्या अधिकाऱ्यांची भेट घेणार आहे की नाही, हे अद्याप स्पष्ट झालेले नाही.

---------------

हिंदुस्थान समाचार / Priyanka Bansode