मॉस्को, 20 सप्टेंबर (हिं.स.)।युक्रेनने रशियावर १,००० हून अधिक ड्रोनने हल्ला केला आहे. रशियन अधिकाऱ्यांच्या हवाल्याच्या वृत्तानुसार, या हल्ल्यात मॉस्कोलाही लक्ष्य करण्यात आले. हा हल्ला राजधानीवर करण्यात आलेल्या आतापर्यंतच्या सर्वात मोठ्या ड्रोन हल्ल्यांपैकी एक असल्याचे सांगण्यात येत आहे. रशियात संसदीय निवडणुकीचा तिसरा आणि अंतिम दिवस सुरू असतानाच हा हल्ला झाला.

मॉस्कोचे महापौर सर्गेई सोब्यानिन यांनी हा राजधानीवर आतापर्यंतचा सर्वात मोठा ड्रोन हल्ला असल्याचे म्हटले. या हल्ल्यात मॉस्को ऑइल रिफायनरी आणि एका निवासी इमारतीचे नुकसान झाल्याचे त्यांनी सांगितले.मॉस्को प्रदेशाचे गव्हर्नर आंद्रेई वोरोब्योव्ह यांच्या म्हणण्यानुसार, ड्रोन हल्ल्यात दोन जणांचा मृत्यू झाला असून २० जण जखमी झाले आहेत. मृतांमध्ये ७४ वर्षीय पुरुष आणि ४४ वर्षीय महिलेचा समावेश आहे.

युक्रेनचे राष्ट्राध्यक्ष वोलोदिमीर झेलेन्स्की यांनी सोशल मीडियावर सांगितले की, या हल्ल्यात युक्रेनमध्ये निर्मित फ्लेमिंगो आणि पेलिकन क्षेपणास्त्रांसह विविध प्रकारची क्षेपणास्त्रे आणि ड्रोन वापरण्यात आले. त्यांच्या म्हणण्यानुसार, तेल आणि लॉजिस्टिक्सशी संबंधित सुविधांना या हल्ल्यांचे लक्ष्य करण्यात आले होते. या हल्ल्यांचा उद्देश रशियाच्या युद्धयंत्रणेला आर्थिक नुकसान पोहोचवणे हा असल्याचे झेलेन्स्की यांनी सांगितले.

दरम्यान, रशियाच्या संरक्षण मंत्रालयाने दावा केला की, त्यांच्या सैन्याने देशभरात १,१०० युक्रेनियन ड्रोन पाडले. मंत्रालयाच्या म्हणण्यानुसार, यामध्ये क्रिमिया आणि काळ्या समुद्रावरून उड्डाण करणाऱ्या ड्रोनचाही समावेश होता. रशियाच्या संरक्षण मंत्रालयाने सांगितले की, त्यांच्या सैन्याने संपूर्ण देशात तसेच रशियाच्या ताब्यात असलेल्या युक्रेनियन द्वीपकल्प क्रिमिया आणि काळ्या समुद्राच्या परिसरात १,१०० युक्रेनियन ड्रोन नष्ट केले.

मॉस्कोचे महापौर सर्गेई सोब्यानिन यांनी सांगितले की, रशियन राजधानीच्या दिशेने येणारे ४५० ड्रोन नष्ट करण्यात आले. या हल्ल्यात मॉस्को ऑइल रिफायनरी आणि एका निवासी इमारतीचे नुकसान झाले. मॉस्कोवरील हा ‘अभूतपूर्व हल्ला’ निवडणुकीत अडथळा निर्माण करण्याचा प्रयत्न होता, असा दावा त्यांनी केला. ते म्हणाले, ‘शत्रू यात अपयशी ठरला.’

रशियात सुरू असलेल्या संसदीय निवडणुकीला युद्ध सुरू झाल्यानंतरची पहिली युद्धकालीन संसदीय निवडणूक म्हटले जात आहे. या निवडणुकीत राष्ट्राध्यक्ष व्लादिमीर पुतिन यांच्या धोरणांना विरोध करणाऱ्या विरोधकांची उपस्थिती अत्यंत मर्यादित राहिली आहे. रशियाने युक्रेनमधील त्या चार प्रदेशांमध्येही मतदान घेतले आहे, ज्यांना युद्धानंतर मॉस्कोने आपल्या देशात विलीन केल्याचा दावा केला होता. मात्र, या प्रदेशांतील सर्व भागांवर रशियाचे नियंत्रण नाही. याशिवाय, २०१४ मध्ये रशियाने आपल्या ताब्यात घेतलेल्या क्रिमियामध्येही मतदान घेण्यात आले. युक्रेनने या प्रदेशांमध्ये रशियाकडून घेण्यात येणाऱ्या निवडणुका बेकायदेशीर असल्याचे म्हटले आहे.काही दिवसांपूर्वी रशियाने युक्रेनची राजधानी कीव्हजवळील बुचा जिल्ह्यातही भीषण हल्ले केले होते. या हल्ल्यात ३७ जणांचा मृत्यू झाला होता.

---------------

हिंदुस्थान समाचार / Priyanka Bansode