ऑकलंड, 23 सप्टेंबर (हिं.स.)न्यूझीलंडने भारताविरुद्धच्या आगामी पाच सामन्यांच्या टी-२० मालिकेसाठी १६ सदस्यीय संघ जाहीर केला आहे. व्हाईट-बॉल कर्णधार मिचेल सँटनर संघाचे नेतृत्व करेल. मालिकेतील पहिला सामना २२ ऑक्टोबर रोजी क्राइस्टचर्चमधील हॅगली ओव्हलवर खेळला जाईल. भारत आणि न्यूझीलंड यांच्यातील पाच सामन्यांची टी-२० मालिका ११ दिवसांत चार शहरांमध्ये खेळवली जाईल. हा भारताच्या न्यूझीलंड दौऱ्याचा एक भाग आहे. यामध्ये पाच एकदिवसीय आणि दोन कसोटी सामन्यांचाही समावेश आहे.

या वर्षीच्या टी-२० विश्वचषकात भारताविरुद्ध अंतिम सामना खेळलेल्या न्यूझीलंड संघातील 13 क्रिकेटपटूंची आगामी मालिकेसाठी निवड करण्यात आली आहे. दुखापतीमुळे विश्वचषकातून बाहेर असलेले मायकल ब्रेसवेल आणि वेगवान गोलंदाज ॲडम मिल्ने यांचे संघात पुनरागमन झाले आहे. मिल्नने आतापर्यंत ५६ आंतरराष्ट्रीय सामन्यांसह २४३ टी२० सामने खेळले आहेत. एका वर्षापेक्षा जास्त काळानंतर त्याचे न्यूझीलंड संघात पुनरागमन झाले आहे. वेगवान गोलंदाजीच्या आक्रमणामध्ये लॉकी फर्ग्युसन, मॅट हेन्री, काईल जेमिसन आणि जेकब डफी यांसारख्या अनुभवी गोलंदाजांचा समावेश आहे. जॅक फाउल्क्स आणि नॅथन स्मिथ हे देखील संघातील युवा वेगवान गोलंदाज आहेत.

अष्टपैलू क्रिकेटपटू रचिन रवींद्र दुखापतीमुळे टी२० मालिकेला मुकणार आहे. गेल्या आठवड्यात एका प्रचार कार्यक्रमादरम्यान त्याला ही दुखापत झाली. तो सुमारे सहा आठवड्यांत पुनर्वसन पूर्ण करेल अशी अपेक्षा आहे आणि ४ नोव्हेंबरपासून सुरू होणाऱ्या एकदिवसीय मालिकेत परतण्याचे त्याचे लक्ष्य आहे.

टी२० विश्वचषकात उत्कृष्ट कामगिरी करणारे फिन ॲलन आणि टिम सेफर्ट पुन्हा एकदा न्यूझीलंडसाठी डावाची सुरुवात करतील. टी२० विश्वचषकानंतर ते पहिल्यांदाच डावाच्या सुरुवातीला एकत्र खेळतील. ॲलनने दक्षिण आफ्रिकेविरुद्धच्या उपांत्य सामन्यात अवघ्या ३३ चेंडूंमध्ये नाबाद शतक झळकावले होते. दरम्यान, सेफर्टने ३३ चेंडूंमध्ये ५८ धावा करून न्यूझीलंडला नऊ गडी राखून सामना जिंकण्यास मदत केली. 'द हंड्रेड' स्पर्धेत सेफर्टला 'प्लेअर ऑफ द टूर्नामेंट' म्हणूनही गौरविण्यात आले. त्याने १६८ च्या स्ट्राईक रेटने ३९४ धावा केल्या, ज्यात अंतिम सामन्यातील ३८ चेंडूंमधील सामना जिंकवून देणाऱ्या ७२ धावांचा समावेश होता. वेगवान गोलंदाज बेन सियर्स घोट्याच्या दुखापतीतून सावरत असल्याने त्याचा संघात समावेश करण्यात आलेला नाही.

---------------

हिंदुस्थान समाचार / वृषाली देशपांडे