केप टाउन, 27 सप्टेंबर (हिं.स.)। दक्षिण आफ्रिकेची राजधानी केप टाउन आणि जोहान्सबर्ग शहरात अंदाधुंद गोळीबाराच्या दोन वेगवेगळ्या घटनांमध्ये एकूण २७ जणांचा मृत्यू झाला आहे. या हल्ल्यांमध्ये २६ जण जखमी झाले आहेत. दक्षिण आफ्रिकेचे पोलीस या सामूहिक गोळीबारामागील बंदूकधाऱ्यांचा शोध घेत आहेत. मात्र, अद्याप या प्रकरणात कोणत्याही आरोपीला अटक करण्यात आल्याची माहिती समोर आलेली नाही. तसेच, या दोन्ही सामूहिक गोळीबारांमागील नेमका हेतूही अद्याप स्पष्ट झालेला नाही.

बंदूकधारी हल्लेखोरांनी केप टाउन आणि जोहान्सबर्गजवळ अवघ्या काही तासांच्या अंतराने दोन भीषण सामूहिक गोळीबाराच्या घटना घडवल्या. या दोन्ही घटनांच्या पाच दिवस आधी डरबनजवळील एका घरातही गोळीबार झाला होता. या घटनेत ११ जणांचा मृत्यू झाला होता. सातत्याने घडणाऱ्या गोळीबाराच्या घटना आणि वाढत्या मृत्यूंमुळे दक्षिण आफ्रिकेत हिंसक गुन्हेगारी तसेच बेकायदा शस्त्रांबाबत पुन्हा एकदा चिंता वाढली आहे.

दक्षिण आफ्रिकेत शनिवार (२६ सप्टेंबर २०२६)ची रात्र अनेक कुटुंबांसाठी दुःखाची ठरली. पहिली गोळीबाराची घटना जोहान्सबर्गपासून सुमारे ८० किलोमीटर नैऋत्य दिशेला असलेल्या वेडेला टाउनशिपमधील एका बारमध्ये शनिवारी रात्री साडेनऊच्या सुमारास घडली.

वृत्तानुसार, स्थानिक पोलिसांनी सांगितले की, एके-४७ रायफल आणि पिस्तूलांनी सज्ज असलेल्या आठ जणांनी प्रथम बारबाहेर उपस्थित असलेल्या लोकांवर अंदाधुंद गोळीबार केला. त्यानंतर हल्लेखोरांनी बारमध्ये प्रवेश करून तेथेही गोळीबार सुरू ठेवला. या हल्ल्यात १३ पुरुष आणि ४ महिलांसह एकूण १७ जणांचा मृत्यू झाला, तर अन्य १५ जण जखमी झाले.

जोहान्सबर्गमधील सामूहिक गोळीबाराच्या सुमारे चार तासांनंतर, रविवार (२७ सप्टेंबर २०२६) रोजी पहाटे १ वाजल्यानंतर केप टाउनच्या बाहेरील भागातील ल्वांडल टाउनशिपमध्ये बंदूकधाऱ्यांनी एका दुकानावर गोळीबार केला. या हल्ल्यात १० जणांचा मृत्यू झाला, तर ११ जण जखमी झाले.

केप टाउन आणि जोहान्सबर्गमधील सामूहिक गोळीबाराच्या घटनांसह गेल्या पाच दिवसांत दक्षिण आफ्रिकेत सामूहिक गोळीबाराची ही तिसरी घटना ठरली आहे.यापूर्वी मंगळवारी (२३ सप्टेंबर) रात्री डरबनमधील क्वामाखुथा टाउनशिपमध्ये एका घरात आयोजित करण्यात आलेल्या पार्टीदरम्यान हल्लेखोरांनी गोळीबार केला होता. या हल्ल्यात एका गर्भवती महिलेसह एकूण ११ जणांचा मृत्यू झाला होता.

---------------

हिंदुस्थान समाचार / Priyanka Bansode