मुंबई, 27 सप्टेंबर (हिं.स.)। 'डॉटरर्स डे' (कन्या दिवस) निमित्त अभिनेत्री कृती सेननने सोशल मीडियाच्या माध्यमातून महिलांच्या सुरक्षेबाबत महत्त्वाचे प्रश्न उपस्थित केले आहेत. तिने म्हटले आहे की, 'डॉटरर्स डे' साजरा करत असताना समाजाने या गोष्टीचाही विचार केला पाहिजे की, आज अनेक तरुणींना सार्वजनिक ठिकाणी वावरताना आपल्या सुरक्षेसाठी सतत सतर्क राहावे लागते. आपल्या इन्स्टाग्राम पोस्टमध्ये कृतीने अनेक मुलींना रोजच्या आयुष्यात ज्या परिस्थितींचा सामना करावा लागतो, त्याकडे लक्ष वेधले आहे.
कृतीने नमूद केले की, 'लाइव्ह लोकेशन' शेअर करणे, सोबत 'पेपर स्प्रे' बाळगणे, एकटे चालण्याऐवजी कॅबची निवड करणे किंवा सुरक्षित वाटण्यासाठी कोणालातरी फोन करणे या गोष्टी आज अनेक महिलांच्या जीवनाचा भाग बनल्या आहेत. तिने प्रश्न केला की, जर एखाद्या मुलीने फोन करून सांगितले की तिचा पाठलाग केला जात आहे किंवा एकटे घरी परतताना ती सतत मागे वळून पाहत आहे, तर त्या कुटुंबाला कसे वाटेल? अभिनेत्रीने असेही म्हटले की, 'डॉटरर्स डे'चा खरा अर्थ तेव्हाच सार्थ ठरेल जेव्हा महिला सार्वजनिक ठिकाणी कोणत्याही भीतीशिवाय आपले आयुष्य जगू शकतील.
आपल्या संदेशात कृतीने अशा समाजाची गरज अधोरेखित केली जिथे महिला रात्री एकटी घरी परतू शकेल, अंधार पडल्यानंतर उद्यानात (पार्क) बसू शकेल, आपल्या पसंतीचे कपडे परिधान करू शकेल आणि कोणत्याही भीतीशिवाय सार्वजनिक वाहतुकीचा वापर करू शकेल. तिने अशा दिवसाची आशा व्यक्त केली जेव्हा मुलींना त्या सुरक्षितपणे पोहोचल्या आहेत हे सांगण्यासाठी वारंवार संदेश पाठवण्याची गरज भासणार नाही. कृतीच्या या पोस्टमुळे सोशल मीडियावर महिलांची सुरक्षा आणि सामाजिक जबाबदारी यांबाबत चर्चा सुरू झाली आहे.
---------------
हिंदुस्थान समाचार / हर्षदा गावकर
