मुंबई, २७ सप्टेंबर (हिं.स.): नितेश तिवारी दिग्दर्शित आणि नमित मल्होत्रा ​​निर्मित 'रामायण' या चित्रपटाबद्दल प्रेक्षकांची उत्सुकता शिगेला पोहोचली आहे. या उत्साहाच्या वातावरणात, निर्मात्यांनी 'रॉकिंग स्टार' यशचा रावणाच्या भूमिकेतील पहिले अधिकृत पोस्टर प्रदर्शित केले आहे.

या पोस्टरमध्ये यश अत्यंत भव्य आणि प्रभावशाली अवतारात दिसत आहे. रत्नांनी जडलेला सोन्याचा मुकुट, मोत्यांच्या अनेक पदरी माळा आणि अंगावरील जड सुवर्णालंकार त्याच्या राजेशाही व्यक्तिमत्त्वाला अधिक उठावदार बनवतात. त्याची भेदक नजर आणि दमदार उपस्थिती रावणाच्या भव्य आणि प्रभावी व्यक्तिमत्त्वाची झलक दर्शवते.

चित्रपटाची चर्चा सुरू झाल्यापासूनच यशची रावणाची भूमिका हा सर्वात जास्त चर्चेचा विषय ठरला आहे. नवीन पोस्टरमध्ये केवळ अभिनेत्याचा लूकच नाही, तर चित्रपटाची भव्यताही दिसून येते. 'रामायण'मध्ये रणबीर कपूर प्रभू श्रीरामाच्या, साई पल्लवी माता सीतेच्या, यश रावणाच्या, सनी देओल हनुमानाच्या आणि रवी दुबे लक्ष्मणाच्या भूमिकेत दिसणार आहेत. या महाकाव्यातील प्रमुख पात्रे आणि त्यांचे भावनिक प्रवास एका भव्य सिनेमॅटिक स्तरावर सादर करण्याचा या चित्रपटाचा उद्देश आहे.

नितेश तिवारी दिग्दर्शित हा चित्रपट दोन भागांत असून, याची निर्मिती नमित मल्होत्रा ​​यांचे 'प्राइम फोकस स्टुडिओज', 'डीएनईजी' (DNEG) आणि यशचे 'मॉन्स्टर माइंड क्रिएशन्स' यांच्या संयुक्त विद्यमाने केली जात आहे. हा चित्रपट जागतिक स्तरावर 'आयमॅक्स' (IMAX) फॉरमॅटमध्ये प्रदर्शित केला जाईल आणि हिंदी, तमिळ, तेलगू, कन्नड व मल्याळम भाषांमध्ये प्रेक्षकांसाठी उपलब्ध असेल. 'रामायण: भाग १' दिवाळी २०२६ मध्ये, तर 'रामायण: भाग २' दिवाळी २०२७ मध्ये प्रदर्शित करण्याचे नियोजन आहे.

---------------

हिंदुस्थान समाचार / हर्षदा गावकर