नागोया (जपान), 30 सप्टेंबर (हिं.स.) । भारतीय महिला हॉकी संघाने उपांत्य फेरीत दक्षिण कोरियाला २-० ने मात देत आशियाई क्रीडा स्पर्धेच्या अंतिम फेरीत प्रवेश केला आहे. भारतीय संघाने आपली प्रभावी कामगिरी कायम ठेवली असून आता ते सुवर्णपदक जिंकण्यापासून फक्त एक पाऊल दूर आहेत. २ ऑक्टोबर रोजी होणाऱ्या अंतिम सामन्यात भारताचा सामना चीनशी होईल. भारतीय महिला संघ आशियाई क्रीडा स्पर्धेतील सुवर्णपदकासाठीची आपली ४४ वर्षांची प्रतीक्षा संपवण्याच्या जवळ पोहोचला आहे आणि ते मिळवण्याच्या दिशेने आणखी एक पाऊल टाकले आहे.

भारतीय महिला संघाने आतापर्यंत चांगली कामगिरी केली असून ते अपराजित आहेत. उपांत्य फेरीच्या पहिल्या दोन क्वार्टरमध्ये दोन्ही संघांना एकही गोल करता आला नाही. मात्र, दुसऱ्या क्वार्टरमध्ये इशिकाने भारताला आघाडी मिळवून दिली. इशिकाने पेनल्टी कॉर्नरचे गोलमध्ये रूपांतर करून भारताला १-० अशी आघाडी मिळवून दिली. चार मिनिटांनंतर, सुनेलिता टोपोने मैदानी गोल करून ही आघाडी दुप्पट केली. दक्षिण कोरियाला अखेरपर्यंत गोल करण्यात अपयश आले आणि भारताने सहज सामना जिंकला.

सुरुवातीला भारत आणि कोरिया यांच्यात एक चुरशीची लढत पाहायला मिळाली. भारताला सुरुवातीच्या काही मिनिटांतच पेनल्टी कॉर्नर मिळाले, पण त्यांना त्याचे गोलमध्ये रूपांतर करता आले नाही. या काळात कोरियाचा मजबूत बचाव स्पष्टपणे दिसून आला. भारताने कोरियाच्या बचावात घुसून गोल करण्याचा प्रयत्न केला, पण त्यांना यश आले नाही. भारताला पहिल्या क्वार्टरमध्ये नऊ पेनल्टी कॉर्नर मिळाले, पण त्यांना एकाही गोलमध्ये रूपांतर करता आले नाही. पहिला क्वार्टर गोलशून्य बरोबरीत संपला. दुसऱ्या क्वार्टरमध्येही तशीच परिस्थिती होती आणि संपूर्ण पहिला हाफ बरोबरीत राहिला.

भारत आणि कोरिया यांच्यात एक चुरशीचा सामना सुरू होता. ३० व्या मिनिटाला पंचांनी बलजीत कौरला ग्रीन कार्ड दाखवले. आघाडी घेण्यासाठी भारतावर दबाव वाढत होता. तिसऱ्या क्वार्टरमध्ये भारताला एक पेनल्टी कॉर्नर मिळाला आणि ४४ व्या मिनिटाला फॉरवर्ड इशिकाने त्याचे गोलमध्ये रूपांतर केले. भारताने १-० अशी आघाडी घेतली. कोरिया पुनरागमन करण्यापूर्वीच, सुनेलिता टोपोने आघाडी दुप्पट केली. टोपोने ४८ व्या मिनिटाला एक मैदानी गोल केला.

---------------

हिंदुस्थान समाचार / वृषाली देशपांडे