सीडीएसएल आयपीएफतर्फे सायकल रॅलीचे आयोजन

सांगली, 10 ऑक्टोबर (हिं.स.) : सिक्युरिटीज अँड एक्स्चेंज बोर्ड ऑफ इंडिया (सेबी) आणि इंटरनॅशनल ऑर्गनायझेशन ऑफ सिक्युरिटीज कमिशन्स (इस्को) यांच्या मार्गदर्शनाखाली सीडीएसएल इन्व्हेस्टर प्रोटेक्शन फंडतर्फे (सीडीएसएल आयपीएफ) सांगलीत जागतिक गुंतवणूक सप्ताह साजरा करण्यात आला. या अभियानाचा भाग म्हणून ‘सवाल करो, स्कॅम्स को स्लॅम करो’ ही जनजागृती मोहीम राबवण्यात आली.

सुरक्षित गुंतवणूक आणि आर्थिक फसवणूक टाळण्यासाठी जनजागृती निर्माण करण्याच्या उद्देशाने सांगली येथील एस. एस. पाटील हायस्कूल आणि कनिष्ठ महाविद्यालयात सायकल रॅलीचे आयोजन करण्यात आले. या रॅलीत विद्यार्थ्यांनी मोठ्या संख्येने सहभाग घेतला.सीडीएसएल आयपीएफकडून गुंतवणूकदारांना आपल्या गुंतवणुकीबाबत जागरूक राहण्यास, प्रश्न विचारण्यास आणि आर्थिक निर्णयांमध्ये सतर्कता बाळगण्यास प्रोत्साहित करण्यात येत आहे.

सीडीएसएल आयपीएफ सेक्रेटेरियटचे प्रमुख सुधीश पिल्लई म्हणाले, “'सवाल करो, घोटाळे को स्लॅम करो' या मोहिमेमुळे गुंतवणूकदारांना शंका विचारण्याची सवय लागते, ज्यामुळे ते अधिक माहितीपूर्ण आणि सुरक्षित निर्णय घेऊ शकतात. हा उपक्रम आत्मनिर्भर गुंतवणूकदार घडवण्याच्या दिशेने महत्त्वाचे पाऊल आहे.” संपूर्ण भारतात 6 ते 12 ऑक्टोबर दरम्यान जागतिक गुंतवणूक सप्ताह साजरा करण्यात येत आहे. सेबी या उपक्रमाचा राष्ट्रीय समन्वयक म्हणून कार्यरत आहे.

-------------------------

हिंदुस्थान समाचार / Aparna Chitnis