वॉशिंग्टन , 16 ऑक्टोबर (हिं.स.)।रशियाकडून तेल खरेदीच्या मुद्द्यावर सध्या भारत आणि अमेरिकेच्या संबंधांमध्ये तणाव आहे. या पार्श्वभूमीवर, अमेरिकेचे अध्यक्ष डोनाल्ड ट्रम्प यांनी एक मोठं वक्तव्य दिलं आहे. त्यांनी म्हटलं की, भारत लवकरच रशियाकडून तेल खरेदी करणं थांबवेल. त्यांनी असा दावा केला की, पंतप्रधान नरेंद्र मोदींनी त्यांना स्वतःहून याबाबत आश्वासन दिलं आहे. ट्रम्प यांनी सांगितलं की, ही रशियावर दबाव वाढवण्याच्या त्यांच्या प्रयत्नांचा एक भाग आहे.अशा प्रकारे रशियाला एकटं पाडता येईल.
व्हाईट हाऊसमधील ओव्हल ऑफिसमध्ये पत्रकारांच्या प्रश्नांना उत्तर देताना ट्रम्प म्हणाले की, पंतप्रधान नरेंद्र मोदी हे त्यांचे चांगले मित्र आहेत आणि दोघांमध्ये उत्तम संबंध आहेत. ते पुढे म्हणाले की, भारत लवकरच रशियाकडून तेल खरेदी थांबवेल आणि असा दावा केला की, मोदींनी त्यांना हे वैयक्तिकरित्या सांगितलं आहे. ट्रम्प म्हणाले की, भारताचा हा निर्णय एक मोठं पाऊल आहे. आता आपल्याला चीनलाही असंच करण्यास सांगावं लागेल.
यावेळी ट्रम्प यांनी भारतातील अमेरिकेचे राजदूत सर्जिओ गोर आणि पंतप्रधान मोदी यांची अलीकडील भेट यावरही प्रतिक्रिया दिली. त्यांनी सांगितलं की, मला वाटतं मोदी एक विलक्षण आणि महान व्यक्ती आहेत. सर्जिओ यांनी मला सांगितलं की, मोदी मला आवडतात. मी अनेक वर्षांपासून भारताकडे पाहतो आहे. पूर्वी प्रत्येक वर्षी एक नवा नेता यायचा, काही महिने टिकायचा, काही वर्षं टिकायचा. पण आता माझा मित्र बऱ्याच काळापासून सत्तेत आहे आणि त्यांनी मला विश्वास दिला की, ते रशियाकडून तेल खरेदी करणं थांबवतील. ट्रम्प पुढे म्हणाले की, हे बदल लगेच लागू होणार नाहीत, पण काही काळात त्याचे परिणाम दिसू लागतील.मात्र, भारतीय सरकारकडून अद्याप या दाव्याची अधिकृत पुष्टी करण्यात आलेली नाही. वॉशिंग्टनमधील भारतीय दूतावासानेही या प्रकरणावर तत्काळ कोणतंही उत्तर दिलं नाही की, पंतप्रधान मोदींनी असं काही म्हटलं आहे की नाही.
दरम्यान, चीननंतर भारत हा रशियाचा दुसऱ्या क्रमांकाचा सर्वात मोठा तेल खरेदीदार आहे. युक्रेन युद्धाच्या पार्श्वभूमीवर ऑगस्ट महिन्यात रशियावर दबाव वाढवण्याच्या प्रयत्नांत अमेरिकेचे अध्यक्ष डोनाल्ड ट्रम्प यांनी भारतावर ५० टक्के टॅरिफ लावलं आहे, ज्यामध्ये रशियन तेल खरेदीवर लावलेलं २५ टक्के टॅरिफही समाविष्ट आहे.ट्रम्प प्रशासनाचा आरोप आहे की, रशियन तेल खरेदी करून चीन आणि भारत युक्रेन युद्धाला निधी पुरवत आहेत.
---------------
हिंदुस्थान समाचार / Priyanka Bansode