मुंबई, 20 ऑक्टोबर (हिं.स.)। कर्करोगावरील उपचार, संशोधन आणि शिक्षणासाठी नवी मुंबईतील टीएमसीच्या प्रगत केंद्रात नवीन कॅन्सर केअर इमारतीचे बांधकाम सुरू करण्याची घोषणा आयसीआयसीआय बँक आणि टाटा मेमोरियल सेंटरने केली. बँकेच्या सीएसआर उपक्रमांतर्गत 625 कोटी रुपयांच्या योगदानाच्या साहाय्याने हे केंद्र भारतातील सर्वात मोठ्या रेडिएशन थेरपी केंद्रांपैकी एक असेल. तसेच अत्याधुनिक कर्करोग उपचार तंत्रज्ञानाने सुसज्ज असेल. महाराष्ट्रातील नवी मुंबई, पंजाबमधील मुल्लानपूर (नवीन चंदीगड) आणि आंध्र प्रदेशातील विशाखापट्टणम येथे प्रत्येकी एक अशा तीन अत्याधुनिक कॅन्सर केअर इमारतींच्या उभारणीसाठी बँकेने टीएमसीला 1,800 कोटी देण्याचे आश्वासन दिले असून, हे केंद्र हा त्याचाच एक भाग आहे.

‘आयसीआयसीआय फाउंडेशन ब्लॉक फॉर रेडिएशन ऑन्कोलॉजी’ या नावाने ओळखल्या जाणाऱ्या इमारतीचे भूमीपूजन तसेच पायाभरणीचा समारंभ करण्यात आला. आयसीआयसीआय बँकेचे अध्यक्ष प्रदीप कुमार सिन्हा, संदीप बत्रा, कार्यकारी संचालक, आयसीआयसीआय बँक; अजय गुप्ता, कार्यकारी संचालक, आयसीआयसीआय बॅंक आणि डॉ. सुदीप गुप्ता, संचालक, टीएमसी हे यावेळी उपस्थित होते.

तळमजला तसेच दोन बेसमेंट असलेली ही 11 मजली इमारत 3.4 लाख चौ. फुटांवर बांधली जाईल. यामध्ये 12 अत्याधुनिक लिनियर एक्सीलरेटर्स (LINACs) आणि कर्करोगाशी संबंधित इतर प्रगत उपकरणे असतील. LINACs कर्करोगाच्या पेशींना अचूक रेडिएशन देतात ज्यामुळे आसपासच्या निरोगी ऊतींचे नुकसान कमी होते.

‘आयसीआयसीआय फाउंडेशन ब्लॉक फॉर रेडिएशन ऑन्कोलॉजी’ दरवर्षी 7,200 रुग्णांना रेडिएशन थेरपीची सोय उपलब्ध करून देईल. या अंतर्गत रुग्णांची दोन लाखांहून अधिक रेडिएशन सत्रांची सोय केली जाईल. या व्यतिरिक्त, वर्षभरात 25,000 नवीन रुग्णांना ओपीडी सल्ला तसेच निदान करण्यास मदत करेल. हे केंद्र 2027 पर्यंत पूर्ण होणे अपेक्षित आहे. आयसीआयसीआय बँकेची सीएसआर शाखा, आयसीआयसीआय फाऊंडेशन फॉर इन्क्लुजिव्ह ग्रोथ, या केंद्राचे बांधकाम आणि एकूणच कामकाजावर देखरेख ठेवेल.

आयसीआयसीआय बँकेचे अध्यक्ष प्रदीप कुमार सिन्हा म्हणाले, “आयसीआयसीआय फाउंडेशन फॉर इन्क्लुझिव्ह ग्रोथमार्फत आम्ही आरोग्य, पर्यावरण, शाश्वत उपजीविका आणि सामुदायिक विकास या क्षेत्रांत काम करतो. देशातील आरोग्यसेवा पायाभूत सुविधा मजबूत करण्याच्या ध्येयाशी सुसंगतपणे टीएमसीसोबत भागीदारी करताना आम्हाला आनंद आहे. हे केंद्र पूर्ण क्षमतेने कार्यान्वित झाल्यावर ‘आयसीआयसीआय फाउंडेशन ब्लॉक फॉर रेडिएशन ऑन्कोलॉजी’ हे भारतातील सर्वात मोठ्या रेडिएशन थेरपी केंद्रांपैकी एक ठरेल आणि गरजूंसाठी प्रगत उपचारांची उपलब्धता वाढवेल.”

आयसीआयसीआय बँकेचे कार्यकारी संचालक संदीप बत्रा म्हणाले, “देशातील कर्करोग पायाभूत सुविधांना पाठिंबा देण्यासाठी आम्ही वचनबद्ध आहोत. विशाखापट्टणम, नवी मुंबई आणि मुल्लानपूर येथे तीन नवीन कँसर रुग्णालयांसाठी टाटा मेमोरियल सेंटरला 1,800 कोटी देण्याचे आश्वासन दिले आहे. विशाखापट्टणममधील नवीन ब्लॉकचे बांधकाम चार महिन्यांपूर्वी सुरू झाले असून, नवी मुंबईतील इमारत अत्याधुनिक सुविधांनी सुसज्ज असेल. निदान आणि उपचार यामुळे रेडिएशन उपचारांची क्षमता सहा पटीने वाढेल. कर्करोगावर प्रगत उपचार आणि रुग्णांसाठी सुलभता सुनिश्चित करण्यासाठी टीएमसीसोबत काम करताना आम्हाला अभिमान आहे.”

नवी मुंबई, नवीन चंदीगड आणि विशाखापट्टणमधील तीन नवीन ब्लॉक्ससाठी आयसीआयसीआय फाउंडेशन फॉर इन्क्लुझिव्ह ग्रोथच्या पाठबळाबद्दल टाटा मेमोरियल सेंटरचे संचालक डॉ. सुदीप गुप्ता आभारी आहेत. त्यांनी सांगितले की, या सुविधांमुळे वंचित रुग्णांना अत्याधुनिक उपचार मिळतील, कार्यक्षमता वाढेल, आणि लहान-मुलांपासून प्रौढांपर्यंत ब्लड कॅन्सरसाठी उत्कृष्ट केंद्रे उभा राहतील. हे केंद्र भारतातील सर्वात मोठ्या रेडिएशन ऑन्कोलॉजी सुविधांपैकी एक असतील आणि गरजू रुग्णांना उत्तम उपचार देण्याच्या वचनबद्धतेला बळ देतील.

अ‍ॅक्ट्रेकचे संचालक डॉ. पंकज चतुर्वेदी म्हणाले, “या सुविधेमुळे टाटा मेमोरियल सेंटरमधील ऍडव्हान्स्ड सेंटर फॉर ट्रीटमेंट, रिसर्च अँड एज्युकेशन इन कॅन्सर परवडणाऱ्या किमतीत अत्याधुनिक उपचार देऊ शकेल आणि कर्करोगासाठी वैद्यकीय, तांत्रिक व पॅरामेडिकल कर्मचाऱ्यांचे प्रशिक्षणही करता येईल. तसेच, संस्थेच्या क्लिनिकल आणि ट्रान्सलेशनल रिसर्चसाठीही हे मोठे प्रोत्साहन ठरेल.”

डॉ. सी.एस. प्रमेश, टाटा मेमोरियल हॉस्पिटलचे संचालक, म्हणाले, “ACTREC मध्ये अत्याधुनिक रेडिएशन उपचारासह नवीन कर्करोग सुविधा स्थापन करण्यासाठी आयसीआयसीआय फाउंडेशन आणि आयसीआयसीआय बँकेचे आभारी आहोत. त्यांनी केवळ आर्थिक मदत केली नाही तर संपूर्ण प्रक्रियेत सक्रिय सहभाग घेतला, जे देशभरातील रुग्णांना आधुनिक कर्करोग उपचार आणि संशोधन मिळवून देण्याच्या आमच्या वचनबद्धतेला बळकटी देते.”

आयसीआयसीआय बँकेचे अध्यक्ष प्रदीप कुमार सिन्हा म्हणाले, “आयसीआयसीआय फाउंडेशन आरोग्य, पर्यावरण, शाश्वत उपजीविका आणि सामुदायिक विकासात काम करते. टीएमसीसोबत भागीदारी करताना आनंद होत आहे. हे केंद्र पूर्ण झाले की ‘आयसीआयसीआय फाउंडेशन ब्लॉक फॉर रेडिएशन ऑन्कोलॉजी’ भारतातील मोठ्या रेडिएशन थेरपी केंद्रांपैकी एक बनेल आणि गरजूंसाठी प्रगत उपचार उपलब्ध करतील.”

---------------

हिंदुस्थान समाचार / Suraj Chaugule