रत्नागिरी, 23 ऑक्टोबर, (हिं. स.) : लायन्स क्लबने रत्नागिरीच्या विशेष कारागृहात दिवाळी पाडवा पहाट आयोजित केली होती. कैद्यांनी उत्स्फूर्तपणे गाणी सादर करून आपल्या कलागुणांचे दर्शन यावेळी घडविले.
लायन्स क्लब आणि सप्तसूर निर्मित ‘दिवाळी पाडवा पहाट – सुरेल गाण्यांचा कार्यक्रम’ कारागृहात आयोजित करण्यात आला. कैद्यांना सणासुदीच्या काळात आनंदाचा आणि सांस्कृतिक अनुभव देण्याचा या कार्यक्रमाचा उद्देश होता. कार्यक्रमात प्रसिद्ध गायकांनी सादर केलेल्या सुरेल गीतांनी कारागृहातील वातावरण भारून गेले. कैद्यांनीही या सुरेल मेजवानीचा मनमुराद आस्वाद घेतला. काही कैद्यांनी उत्स्फूर्तपणे गाणी सादर करून आपल्या कलागुणांचे दर्शन घडवले. त्यामुळे वातावरणात आपुलकी आणि आनंदाची लहर पसरली.
कार्यक्रमास कारागृह अधीक्षक संजय पाटील प्रमुख अतिथी म्हणून उपस्थित होते. त्यांनी लायन्स क्लबच्या पदाधिकाऱ्यांचा सत्कार करून सामाजिक व सांस्कृतिक उपक्रमांबद्दल मनःपूर्वक आभार मानले.
या वेळी MJF गणेश धुरी, शामल शेठ, अध्यक्ष संजय पटवर्धन, शरद नागवेकर, मनोज सावंत, डॉ. गणेश कुलकर्णी, अस्लम वास्ता, अॅड. महेंद्र मांडवकर, अमेय वीरकर, विशाल ढोकले उपस्थित होते.
---------------
हिंदुस्थान समाचार / रत्नागिरी
