मुंबई, 28 ऑक्टोबर (हिं.स.)राष्ट्रवादी काँग्रेस (शरदचंद्र पवार) पक्ष बीड जिल्ह्यात आगामी स्थानिक स्वराज्य संस्थांच्या निवडणुकांसाठी पूर्णपणे सज्ज असून जनतेच्या विश्वासाचा विजय निश्चित होईल असे मत बीडचे विधानसभा मतदारसंघाचे आमदार संदीप क्षीरसागर यांनी बैठकीत मांडले.
आज मुंबई येथे राष्ट्रवादी काँग्रेस (शरदचंद्र पवार) पक्षाचे राष्ट्रीय अध्यक्ष शरदचंद्र पवार यांच्या अध्यक्षतेखाली तसेच प्रदेशाध्यक्ष शशिकांत शिंदे यांच्या व अन्य प्रमुख नेत्यांच्या उपस्थितीत बीड जिल्ह्याच्या स्थानिक स्वराज्य संस्थांच्या निवडणुकांच्या तयारीचा आढावा घेण्यासाठी लोकप्रतिनिधींची बैठक संपन्न झाली.
या बैठकीस बीड जिल्ह्यातील सर्व प्रमुख पदाधिकारी उपस्थित होते. जिल्ह्यातील पक्ष संघटनेची स्थिती, आगामी निवडणुकांची रणनीती तसेच जनतेच्या प्रश्नांवर पक्षाची भूमिका याबाबत सविस्तर चर्चा करण्यात आली.
बैठकीदरम्यान मार्गदर्शन करत पक्ष संघटनेने एकसंधतेने कार्य करून शिव - फुले - शाहू - आंबेडकरांच्या विचारांचा प्रसार करावा, सर्व जाती धर्मातील लोकांना सोबत घेऊन निवडणुकीला सामोरे जाण्याचे आवाहन केले.
---------------
हिंदुस्थान समाचार / Aparna Chitnis
