कोल्हापूर, 17 नोव्हेंबर (हिं.स.)।

कागल विधानसभा मतदार संघातील चंदगड गडहिंग्लज नगर परिषदेच्या निवडणूकीसाठी राष्ट्रवादी अजित पवार गटाचे नेते आणि मंत्री हसन मुश्रीफ यांनी राष्ट्रवादी शरद पवार गटाशी युती केल्या नंतर आता कागल नगर परिषदेसाठी कट्टर विरोधक असलेले समरजितसिंह घाटगे यांच्या छत्रपती शाहू आघाडीशी युती केल्याची घोषणा प्रसिद्धी पत्रकाद्वारे केली. यातून त्यांनी माजी आ. संजय बाबा घाटगे गट, शिवसेना शिंदे गट आणि भाजपलाही धक्का दिला. कागल शहर आणि तालुक्याचा विकास, तसेच संघर्षाच राजकारण टाळण्यासाठी हा निर्णय घेतला असल्याचे मंत्री मुश्रीफ यांनी म्हंटले आहे

प्रसिध्दी पत्रकात पुढे म्हटले आहे, आज राष्ट्रवादी व छत्रपती शाहू आघाडी- कागल यांची कागल नगरपरिषदेमध्ये आघाडी झाली. ही घटना इतकी अनपेक्षितपणे घडली की, प्रमुख कार्यकर्ते, पदाधिकारी यांच्याशी सल्लामसलत न करता आली नाही. याबाबत मी या सर्वांची माफी मागतो. तसेच; माझे ज्येष्ठ मित्र माजी आमदार संजयबाबा घाटगे व त्यांच्या प्रमुख कार्यकर्त्यांना विश्वासात न घेता हा निर्णय घ्यावा लागला. त्याबद्दल त्यांची व त्यांच्या कार्यकर्त्यांची दिलगिरी व्यक्त करतो. या आघाडीमुळे त्यांचा आणि त्यांच्या कार्यकर्त्यांचा विश्वासघात होणार नाही. आपल्या झालेल्या चर्चेपासून मी ढळणार नाही. उलट; शिर्षस्थ नेतृत्वाबरोबर बसून त्यांच्या कार्यकर्त्यांना जादा दिलासा कसा मिळेल, याबाबत मी प्रयत्न करीन. माझ्या व संजयबाबांच्या चर्चेमधून गैरसमज पण दूर होईल, याची मला खात्री आहे. सदर आघाडी ही कागल शहराच्या व तालुक्याच्या विकासासाठी व विनाकारण सुरू असलेला संघर्ष थांबवण्यासाठी व जनतेला भरभरून कसे देता येईल, यासाठी झालेली आहे. यामध्ये कोणताही दुसरा हेतू नाही. याबाबत; मंगळवार दि. १८ रोजी चार वाजता मटकरी हॉलमध्ये मी व समरजीतसिंह घाटगे अशी संयुक्त पत्रकार परिषद घेऊन आमची भूमिका आणि पुढील दिशा स्पष्ट करणार आहोत.

आता आपली सर्वांची जबाबदारी आहे, राष्ट्रवादी काँग्रेस व छत्रपती शाहू आघाडीच्या नगराध्यक्षसह सर्वच्या सर्व उमेदवार प्रचंड मतांनी निवडून आणणे. त्यासाठी आपण सर्वजण जिवाचे रान करू. बाकी; सर्व पत्रकार परिषदेमध्ये मन मोकळे करू.

---------------

हिंदुस्थान समाचार / VijayKumar Pandurang Powar