अमरावती, 5 नोव्हेंबर (हिं.स.)

मेलघाटमधील खुटीडा, एकताई, सिमोरी आणि हातरू या दुर्गम भागांमध्ये रस्ते, वीज आणि पुलांच्या कामांना जिल्हाधिकारी आशिष येरेकर यांनी हिरवा कंदील दाखवला आहे. या भागातील रस्त्यांचा तातडीने विकास सुनिश्चित करण्यासाठी आवश्यक बजेटची तयारी करण्याचे निर्देश त्यांनी दिले.मेलघाटच्या नागरिकांनी त्यांच्या विविध मागण्यांसाठी जिल्हाधिकारी कार्यालयात निवेदन सादर केले होते. त्यानंतर ग्रामीणांसोबत चर्चा आयोजित करण्यात आली. या बैठकीत उपजिल्हाधिकारी अनिल भटकर, उपवनसंरक्षक अर्जुना के. आर., किती जमदाडे तसेच स्थानिक नागरिक उपस्थित होते.जिल्हाधिकारी येरेकर म्हणाले की, खुटीडा ते सिमोरी आणि सोमिथा ते खुटीडा या मार्गांच्या कामांना प्राधान्य दिले जाईल. रस्ता बांधणीसाठी रोजगार हमी योजनेच्या माध्यमातून पर्यायांचा ही विचार करण्यात येईल. हातरू ते करंजखेड या मार्गावरील संपर्क तुटण्याची समस्या सोडवण्यासाठी पुल उभारला जाईल. यासाठी सुमारे 15 कोटी रुपयांचा निधी शासनाकडून मागविण्यात येणार आहे.

वीज समस्या कायमस्वरूपी दूर करण्यासाठी जरिदा उपकेंद्रामार्फत 22 गावांना वीज पुरवठा सुनिश्चित केला जाणार आहे. वीज नसल्यामुळे मोबाईल नेटवर्कही बाधित होते, यावरही उपाययोजना करण्याचे निर्देश देण्यात आले. आदिवासी भागातील मका खरेदीची जबाबदारी आदिवासी विभागाकडून सुनिश्चित करण्यात येणार आहे. सर्व कामांसाठी शासन स्तरावर तात्काळ कारवाई केली जाईल.

---------------

हिंदुस्थान समाचार / अरुण जोशी