सोलापूर, 5 नोव्हेंबर, (हिं.स.)। सांगोला नगरपालिका निवडणुकीच्या अनुषंगाने प्रभाग रचना आरक्षण प्रक्रिया पूर्ण झाली आहे. निवडणुकीबाबतचे उर्वरित कामकाज प्रशासनाकडून उरकून घेण्याचा प्रयत्न सुरू आहे. दरम्यान, नगरपालिका निवडणुका येत्या दोन महिन्यात पूर्ण होतील, अशी शक्यता वर्तवण्यात येत आहे. परंतु जुनी नगरपालिका इमारत पाडल्याने सद्यस्थितीत वापरात असलेल्या नगरपालिका इमारतीमध्ये विभागीय कार्यालय बसत नाही. जागेअभावी पत्र्याच्या शेडमध्ये आरोग्य विभागासह इतर प्रमुख विभाग कार्यरत आहेत. तर निवडणूक झाल्यानंतर नगराध्यक्ष व नगरसेवक यांना बसण्यासाठी सभागृह तथा कार्यालय कुठे असणार? असा सवाल आता भावी नगराध्यक्ष व नगरसेवक तसेच सांगोलाकरांकडून उपस्थित केला जात आहे.
सांगोला नगरपालिकेच्या नवीन प्रशस्त इमारतीच्या बांधकामासाठी जुनी नगरपालिका इमारतीचे बांधकाम ऑगस्ट 2024 मध्ये पाडण्यात आले आहे. सध्या कार्यरत असलेल्या नगरपालिका इमारतीमध्ये 7 विभागीय कार्यालयाचे कामकाज सुरू आहेत. यामध्ये मुख्याधिकारी कक्ष, जन्म-मृत्यू नोंदणी विभाग, कर विभाग, खिडकी क्रमांक एक, सभा विभाग, लेखा विभाग, बांधकाम विभाग पहिल्या मजल्यावर पाणीपुरवठा विभाग कार्यरत आहेत.
---------------
हिंदुस्थान समाचार / यशपाल गायकवाड
