पुणे, 6 नोव्हेंबर, (हिं.स.)। पुणे महापालिकेच्या निवडणुकीसाठी प्रभागनिहाय मतदारयाद्या तयार करण्याचे काम सुरू आहे. यामध्ये शहरातील काही अनुभवी माजी नगरसेवकांनी मतदारांची पळवापळवी सुरू केली आहे. विरोधात जाणारे मतदान अन्य प्रभागांत आणि दुसऱ्या प्रभागांतील मतदान जे आपल्या बाजूने पडण्याची शक्यता आहे त्यांना स्वतःच्या प्रभागांत वळविण्यासाठी खटाटोप सुरू आहे. त्यासाठी प्रशासनातील कर्मचाऱ्यांना हाताशी धरले जात आहे. प्रकार मध्यवर्ती पेठांसह उपनगरांमध्येही सुरू आहेत. मात्र, प्रशासनाने असा कोणताही प्रकार घडला नसल्याचा दावा केला आहे.

राज्य निवडणूक आयोगाने प्रभागनिहाय मतदारयाद्यांची फोड करण्यासाठी कार्यक्रम जाहीर केला. पुणे महापालिकेला १४ ऑक्टोबर रोजी मतदारयादी सुपूर्त केली. या मतदारयादीची प्रभागनिहाय फोड करून प्रारूप मतदारयादी जाहीर करण्यासाठी १४ नोव्हेंबरपर्यंतची मुदत देण्यात आली होती. गेल्या २० दिवसांपासून १५ क्षेत्रीय कार्यालयांच्या स्तरावर मतदारयाद्या तयार करण्याचे काम सुरू आहे.

---------------

हिंदुस्थान समाचार / भूषण राजगुरु