अकोला, 6 नोव्हेंबर (हिं.स.)।
जिल्ह्यातील 15 वाळू घाट लिलाव यापूर्वीच जाहीर करण्यात आला आहे. ई-लिलावाच्या वेळापत्रकात बदल करण्यात आला असून, शुद्धीपत्रक निर्मगित करण्यात आले आहे. जास्तीत जास्त लिलावधारकांनी सहभाग नोंदवावा, असे आवाहन जिल्हाधिकारी वर्षा मीना यांनी केले आहे.
ई- निविदा ऑनलाईन स्वीकारण्याची मुदत दि. 6 नोव्हेंबर रोजी दु. 2 पर्यंत होती. ती आता दि. 14 नोव्हेंबर रोजी दु. 2 पर्यंत वाढविण्यात आली आहे. ई-निविदा (तांत्रिक लिफाफा) उघडणे, तत्पूर्वीची तांत्रिक पडताळणी आदी प्रक्रिया सुधारित वेळापत्रकानुसार दि. 17 नोव्हेंबर रोजी करण्यात येईल. ई- लिलाव प्रक्रिया (ई-ऑक्शन) दि. 20 नोव्हेंबर रोजी सकाळी 10 वा. पासून दु. 1 वा. पर्यंत पूर्ण करण्यात येईल. अधिकाधिक लिलावधारकांनी सहभाग नोंदवावा, असे आवाहन करण्यात आले आहे. सुधारित वेळापत्रक शासनाच्या महाटेंडर्स, तसेच जिल्हा प्रशासनाच्या संकेतस्थळावर उपलब्ध आहे.
`एकूण 15 वाळूघाट`
अकोला तालुक्यातील कपिलेश्वर, वडद खु., एकलारा. कट्यार, म्हैसांग हे पूर्णेवरील 5 घाट, तसेच उगवा येथील मोर्णेवरील घाटाचा समावेश आहे. अकोट तालुक्यात केळीवेळी व पिलकवाडी येथील पूर्णेवरील घाटांचा समावेश आहे. बाळापूर तालुक्यात निंबी, बहादूरा, सागद, लोहारा-1. डोंगरगाव या मन नदीवरील, तसेच नागद या पूर्णेवरील आणि मांजरी येथील कांचनपूर्णेच्या घाटाचा समावेश आहे.
---------------
हिंदुस्थान समाचार / जयेश गावंडे
