नवी दिल्ली, 10 डिसेंबर (हिं.स.)भारताची सर्वात मोठी विमान कंपनी इंडिगो सध्या इतिहासातील सर्वात कठीण काळातून जात आहे. दरम्यान, नागरी विमान वाहतूक महासंचालनालयाने (डीजीसीए) इंडिगोच्या सीईओंना गुरुवारी दुपारी ३ वाजेपर्यंत अलिकडच्या ऑपरेशनल व्यत्ययांबाबत व्यापक डेटा आणि अपडेट्स सादर करण्याचे निर्देश दिले आहेत. बुधवारी, इंडिगोच्या संकटाच्या नवव्या दिवशी, बंगळुरू विमानतळावरून ६१ उड्डाणे रद्द करण्यात आली, ज्यात ३५ आगमन आणि २६ निर्गमन यांचा समावेश आहे. इंडिगोचे सीईओ पीटर एल्बर्स यांनी काल, ९ डिसेंबर रोजी एअरलाइनची परिस्थिती आता सामान्य झाली आहे असा दावा केल्यानंतर ही बाबा समोर आली आहे.
डीजीसीएने सांगितले की, सीईओंना सर्व संबंधित विभागांच्या वरिष्ठ अधिकाऱ्यांसोबत बैठकीला उपस्थित राहण्याचे निर्देश देण्यात आले आहेत. नियामकाच्या आदेशानुसार, एअरलाइनला उड्डाणे पुन्हा सुरू करणे, पायलट आणि क्रू भरती योजना, पायलट आणि केबिन क्रू संख्या, रद्द केलेल्या उड्डाणांची संख्या आणि आतापर्यंत जारी केलेल्या परताव्यांची माहिती सादर करण्यास सांगण्यात आले आहे.
दररोज सुमारे २,३०० उड्डाणे चालवणारी आणि देशांतर्गत विमान वाहतूक बाजारपेठेतील ६०% पेक्षा जास्त हिस्सा व्यापणारी ही कंपनी सध्याच्या संकटापासून सुमारे २१,००० कोटी रुपयांनी घसरली आहे. एअरलाइनची परिस्थिती सामान्य होत असल्याचे दावे करूनही, उड्डाणे रद्द करण्याचे प्रकार सुरूच आहेत.
गेल्या नऊ दिवसांपासून सुरू असलेल्या इंडिगो संकटाचे मुख्य कारण म्हणजे १ डिसेंबरपासून देशभरातील हजारो उड्डाणे रद्द करण्यात आली आहेत. नवीन सुरक्षा नियमांचे पालन करण्यासाठी एअरलाइनने वेळेवर नियोजन केले नाही, ज्यामुळे तिच्या कामकाजात लक्षणीय व्यत्यय आला आहे. यामुळे प्रवाशांची गैरसोय झाली आहे, तिकिटांच्या किमती वाढल्या आहेत आणि विमानतळांवर गर्दी झाली आहे. प्रवाशांनी नोंदवले आहे की अनेक उड्डाणे पूर्वसूचना किंवा मंजुरीशिवाय पुन्हा वेळापत्रकबद्ध करण्यात आली आहेत किंवा गंभीर विलंब झाला आहे.
चालू असलेल्या व्यत्ययादरम्यान, सरकार कठोर भूमिका घेत असल्याचे दिसून येते. डीजीसीएने सुरुवातीला इंडिगोच्या सीईओ आणि सीओओ यांना कारणे दाखवा नोटीस बजावली होती, त्यानंतर जास्त किंमत रोखण्यासाठी विमान भाड्यावर मर्यादा घालण्यात आली होती. त्यानुसार, मंगळवारी सरकारने इंडिगोच्या हिवाळी उड्डाण वेळापत्रकात १०% कपात करण्याचे आदेश दिले. यामुळे दररोज अंदाजे २२० उड्डाणे कमी होतील. नागरी उड्डाण मंत्री के. राममोहन नायडू यांनी सांगितले की, इंडिगोच्या कामकाजात स्थिरता आणण्यासाठी आणि उड्डाणे रद्द होण्याचे प्रमाण कमी करण्यासाठी हे पाऊल आवश्यक आहे.
---------------
हिंदुस्थान समाचार / वृषाली देशपांडे
10 Dec 2025
