ठाणे, 18 डिसेंबर (हिं.स.) - मराठी विज्ञान परिषद, ठाणे विभाग आणि इंदाला कॉलेज ऑफ इंजिनिअरिंग, पॉलिटेक्निक अँड फार्मसी, कल्याण यांच्या संयुक्त विद्यमाने `सृजन कुंभ २०२६' या राष्ट्रीय स्तरावरील महत्त्वपूर्ण उदयोन्मुख तंत्रज्ञान शिखर संमेलनाचे आयोजन करण्यात आले आहे. सदर संमेलन दि. १७ व १८ जानेवारी २०२६ रोजी इंदाला कॉलेज ऑफ इंजिनिअरिंग, पॉलिटेक्निक अँड फार्मसी, कल्याण–मुरबाड रोड, बापसई, कल्याण येथे आयोजित करण्यात आले आहे अशी माहिती आज एका पत्रकार परिषदेत देण्यात आली.

पत्रकार परिषदेला मराठी विज्ञान परिषद, ठाणे विभागाचे अध्यक्ष दा. कृ. सोमण, सेक्रेटरी नामदेव मांडगे, इंदाला ग्रुप ऑफ इन्स्टिट्यूशन्सचे कार्यकारी संचालक डॉ. विजय महाजन आणि मान्यवर उपस्थित होते.

शिखर संमेलन उपक्रमामध्ये शैक्षणिक तज्ज्ञ, संशोधक, उद्योगतज्ज्ञ, स्टार्टअप्स, नवोन्मेषक, उद्योजक आणि विद्यार्थी यांना एकत्र आणून तंत्रज्ञानातील नाविन्यपूर्ण संशोधन, व्यावहारिक उपयोग आणि भविष्यातीलसंधींवर उदयोन्मुख तंत्रज्ञान याविषयी सखोल चर्चा करण्यात येणार आहे.

उद्योग–शिक्षण सहकार्य, कौशल्य विकास, संकल्पनांचे रूपांतर आणि भविष्यातील करिअर संधी निर्माण करणे हा या शिखर संमेलनाच प्रमुख उद्देश आहे.दोन दिवस चालणाऱ्या या राष्ट्रीय समिटमध्ये विविध उपक्रमांचे आयोजन करण्यात आले असून, त्यामार्फत सर्जनशीलता वृद्धिंगत करणे, संशोधनाभिमुखता निर्माण करणे आणि प्रत्यक्ष अनुभवाधारित शिक्षणाला प्रोत्साहन देण्यात येणार आहे. आधुनिक तंत्रज्ञान व कारखान्यांना आवश्यक असलेले मनुष्यबळ निर्मिती, स्टार्टअप यांना सहाय्य आणि त्यांचे सादरीकरण करण्यात येणार आहे. यामध्ये प्रामुख्याने प्रख्यात वैज्ञानिक, तंत्रज्ञान व उद्योगतज्ज्ञांचा सहभाग, स्टार्टअप्स, उद्योग व विद्यार्थ्यांनी विकसित केलेली अभिनव उत्पादने, मॉडेल्स व प्रोटोटाइप्स, रोबोटिक्स याचे सादरीकरण, IoT, 3D प्रिंटिंग व उदयोन्मुख तंत्रज्ञानांवरील प्रत्यक्ष प्रशिक्षण यावर कार्यशाळा, उद्योगमुख तंत्रज्ञानाची दिशा, नवोन्मेष पर्यावरण, कौशल्य विकास व उद्योगातील नव्या संधी यावर चर्चा , मॉडेल मेकिंग व पोस्टर सादरीकरण स्पर्धा, विद्यार्थ्यांचे प्रकल्प सादरीकरण आणि स्टार्टअपसाठी मार्गदर्शन तसेच उद्योगमुख तंत्रज्ञान व आंतरशाखीय संशोधनावरील उच्च दर्जाचे संशोधन पेपर्स सादरीकरण करण्यात येणार आहे.

यावेळी ख्यातनाम शास्त्रज्ञ, पद्मविभूषण डॉ अनिल काकोडकर, पद्मभूषण डॉ. जे. बी. जोशी (कुलपती, ICT मुंबई), डॉ. एस. वेंकटेश शर्मा (माजी कार्यक्रम संचालक, ISRO) मार्गदर्शन करणार आहेत. तसेच व्याख्याते म्हणून प्रा. पी. एस. व्ही. नटराज - प्राध्यापक, IIT बॉम्बे; भुवनसिंग दमाहे - डीजीएम, L&T; अतुल कहाते - भावनिक शिक्षणतज्ज्ञ, ट्रेनर व लेखक; ऋषिकेश पाटणकर - उपाध्यक्ष, NSDC; डॉ सुहास देशमुख - संचालक, NCVET Delhi; नितीन कोमावर, संस्थापक, Grok लेअरनिंग Pvt Ltd; डॉ. निनाद मेहेंदळे, सहयोगी प्राध्यापक, के. जे. सोमय्या कॉलेज हे व्याख्याते म्हणून उपस्थित राहणार आहेत.

इंजिनिअरिंग, पॉलिटेक्निक, ITI, फार्मसी व विज्ञान शाखेतील विद्यार्थी, प्राध्यापक, संशोधक, उद्योग क्षेत्रातील व्यावसायिक, शिक्षणतज्ज्ञ व नवोन्मेष-आधारित संस्था, स्टार्टअप यांचाही सदर संमेलनात समावेश आहे.

---------------

हिंदुस्थान समाचार / हर्षदा गावकर