रत्नागिरी, 22 डिसेंबर, (हिं. स.) : मिशन बंधारे उपक्रमांतर्गत पंचायत समितीच्या माध्यमातून रत्नागिरीत तालुक्यात एकाच दिवशी २३ डिसेंबर रोजी ९५ ग्रामपंचायतीमध्ये मिशन बंधारे मोहीम राबविण्यात येणार आहे.

एकाच दिवशी राबविण्यात येणाऱ्या या मोहिमेमध्ये विजय, वनराई, कच्चे बंधारे बांधले जाणार आहेत. सुमारे ५०० पेक्षा अधिक बंधारे बांधण्याचे नियोजन असून, मिशन बंधारे मोहिमेत सर्वांनी सहभागी व्हावे, असे आवाहन गटविकास अधिकारी चेतन शेळके यांनी केले आहे.

या मोहिमेच्या नियोजनासंदर्भातील बैठक पंचायत समिती स्तरावर पार पडली असून या मोहिमेअंतर्गत एकाच दिवशी ५०० हुन अधिक बंधारे बांधले जाणार आहेत. या मोहिमेसाठी ग्रामपंचायत पातळीवर अंमलबजावणीसाठी जिल्हा परिषद गटनिहाय संपर्क अधिकारी व पंचायत समितीनिहाय ग्रामपंचायत संपर्क अधिकारी यांची नियुक्ती करण्यात आली आहे. त्यामध्ये गटविकास अधिकारी, पंचायत समिती तालुकास्तरीय अधिकारी यांचा समावेश आहे. प्रत्येक पथकामध्ये विस्तार अधिकारी (कृषी, ग्रामपंचायत, सांख्यिकी, शिक्षण) केंद्रप्रमुख, अंगणवाडी पर्यवेक्षिका, आरोग्य पर्यवेक्षक, पशुधन विकास अधिकारी, पशुधन पर्यवेक्षक, तालुका अभियान व्यवस्थापक (एमएसआरएलएम) यांचा समावेश असेल.

श्रमदान तसेच लोकसहभागातून ही मोहीम राबविली जाणार आहे. त्यामध्ये सर्व सरपंच, उपसरपंच, ग्रामपंचायत सदस्य, आजी-माजी पदाधिकारी, सदस्य व तसेच उमेद समूहातील महिला बचतगट, ग्रामपंचायत कर्मचारी व ग्रामस्थ सहभागी होणार आहेत.

---------------

हिंदुस्थान समाचार / रत्नागिरी