रत्नागिरी, 23 डिसेंबर, (हिं. स.) : रत्नागिरी सिटी बॅडमिंटन असोसिएशनने ९ ते १९ वर्षे वयोगटातील मुला-मुलींसाठी आयोजित केलेल्या जिल्हास्तरीय खुल्या ज्युनिअर बॅडमिंटन स्पर्धेत १९ वर्षांखालील गटात आर्यन वेल्हाळ आणि नेहा मुळ्ये यांनी विजेतेपद पटकावले.
स्पर्धेतील विजेते असे - १७ वर्षांखालील मुली: नेहा मुळ्ये, १७ वर्षांखालील मुले- आर्यन वेल्हाळ, १५ वर्षांखालील मुली: रिया पेढामकर, १५ वर्षांखालील मुले: समर्थ पवार, १३ वर्षांखालील मुली: विश्वा गमरे, १३ वर्षांखालील मुले: समर्थ पवार, ११ वर्षांखालील मुली: वल्लरी देवस्थळी, ११ वर्षांखालील मुले: अभिराज पवार, ९ वर्षांखालील मुली: शार्वी साळुंखे, ९ वर्षांखालील मुले: अभिराज पवार.
बक्षीस वितरण समारंभाचे अध्यक्षस्थान रत्नागिरी सिटी बॅडमिंटन असोसिएशनचे अध्यक्ष प्रसन्न आंबुलकर यांनी भूषवले. या प्रसंगी अमित मुळ्ये, सुधीर बाष्टे, सरोज सावंत व सीताराम सावंत उपस्थित होते. सूत्रसंचालन रत्नागिरी जिल्हा बॅडमिंटन असोसिएशनचे सचिव रजनीश महागावकर यांनी केले. अध्यक्षीय भाषणात आंबुलकर यांनी स्पर्धेला उत्कृष्ट प्रतिसाद दिल्याबद्दल सर्व खेळाडू, पालक व बॅडमिंटन प्रशिक्षकांचे आभार मानले. राज्य व राष्ट्रीय पातळीवरील खेळाडू घडवण्यासाठी खेळाडूंना सातत्याने स्पर्धात्मक संधी मिळणे आवश्यक असल्याचे त्यांनी नमूद केले. भविष्यातही अशा स्पर्धांचे आयोजन करून होतकरू खेळाडूंना सर्वतोपरी सहकार्य करण्याचे आश्वासन त्यांनी दिले.
---------------
हिंदुस्थान समाचार / रत्नागिरी
23 Dec 2025
