रत्नागिरी, 5 डिसेंबर, (हिं. स.) : मत्स्यव्यवसाय विभागामार्फत आयोजित करण्यात येणारे सहा महिन्यांचे सागरी मत्स्यव्यवसाय, नौकानयन व सागरी इंजिन देखभाल व परिचालन प्रशिक्षण 1 जानेवारी 2026 पासून रत्नागिरीच्या मत्स्यव्यवसाय प्रशिक्षण केंद्रात सुरू होत आहे. या प्रशिक्षणसाठी 29 डिसेंबर 2025 पर्यंत अर्ज मागविण्यात येत आहेत.

प्रशिक्षणासाठी उमेदवाराचे वय 18 ते 35 वर्ष, उमेदवार किमान चौथी पास, क्रियाशील मच्छिमार व किमान एक वर्ष मासेमारीचा अनुभव आवश्यक आहे. प्रशिक्षणाचे शुल्क प्रतिमाह 450 रुपये याप्रमाणे सहा महिन्यांचे 2 हजार 700 रुपये व दारिद्र्यरेषेखालील उमेदवारांसाठी प्रतिमाह 100 रुपये प्रमाणे सहा महिन्यांचे 600 रुपये आहे. आधारकार्ड, रेशनकार्ड व शाळा सोडल्याच्या दाखल्याची छायाप्रत, दारिद्र्यरेषेखालील असल्यास ग्रामसेवक/गटविकास अधिकारी यांचा दाखला जोडणे आवश्यक आहे.

प्रशिक्षणानंतर राष्ट्रीय सहकार विकास निगम (एनसीडीसी) अंतर्गत योजनेतून अर्थसाह्य घेऊन मच्छिमारी नौका बांधता येतील. तसेच सागरी नौकांवर पात्रतेनुसार खलाशी म्हणून रोजगाराच्या संधी उपलब्ध होऊ शकतात. अर्ज स्वत:च्या हस्ताक्षरात भरून त्यावर मच्छिमार संस्थेची शिफारस घेऊन अर्ज सादर करावेत.

इच्छुक युवकांनी प्रशिक्षण केंद्राशी किंवा मोबाइल व व्हॉटस्अॅप क्रमांक 9422371901 अथवा ई-मेल आयडी ftcrtn@gmail.com वर संपर्क साधावा, असे आवाहन मत्स्यव्यवसाय प्रशिक्षण अधिकारी जी. द. सावंत यांनी केले आहे.

---------------

हिंदुस्थान समाचार / रत्नागिरी