चंद्रपूर, 10 जानेवारी (हिं.स.) :

देशातील ‘हाय-प्रोफाइल’ किडनी तस्करी प्रकरणाच्या तपासात किमान नऊ राज्यांतील संबंध उघडकीस आले असून, चंद्रपूर पोलिसांच्या निष्कर्षांवर आधारित तामिळनाडू सरकारने आरोग्य सेवा संचालनालयाच्या अंतर्गत उच्चस्तरीय चौकशी समिती स्थापन केली आहे. या समितीमार्फत चौकशीला सुरुवात करण्यात आली आहे.

चंद्रपूर पोलिसांनी तामिळनाडूतील डॉक्टर राजरत्नम गोविंदास्वामी यांना फरार घोषित केले असले, तरी तामिळनाडू आरोग्य विभागाच्या पथकाने अलीकडेच स्टार किम्स रुग्णालयात त्यांची व्हिडिओग्राफीद्वारे चौकशी केल्याचे समोर आले आहे. तसेच मद्रास उच्च न्यायालयाच्या मदुराई खंडपीठाने गोविंदास्वामी यांना ट्रान्झिट जामीन मंजूर केला असून, चंद्रपूर न्यायालयात हजर राहून नियमित जामीन घेण्याची परवानगी दिल्याचा उल्लेख अहवालात करण्यात आला आहे. मात्र, या आदेशाची प्रमाणित प्रत अद्याप प्राप्त झालेली नसून, त्यांच्या हजेरीची प्रतीक्षा असल्याचे चंद्रपूर पोलीस सूत्रांनी सांगितले.

या प्रकरणाच्या तपासासाठी गठीत विशेष तपास पथक (एसआयटी) कर्नाटकातील बेंगळुरू येथील एका पीडितेचा तसेच ज्या व्यक्तीवर तिचे मूत्रपिंड प्रत्यारोपण करण्यात आले, त्याचा शोध घेत आहे.

याशिवाय, तिरुचिरापल्ली (त्रिची) येथील रुग्णालयात मूत्रपिंड काढण्याच्या शस्त्रक्रियेदरम्यान मृत्युमुखी पडलेल्या बांगलादेशी नागरिकाशी संबंधित प्रकरणाचाही तपास सुरू आहे.

या रॅकेटचा कथित प्रमुख सूत्रधार ‘डॉ. कृष्णा’ म्हणून ओळखला जाणारा रामकृष्ण सुंचू याने जामिनासाठी चंद्रपूर सत्र न्यायालयात अर्ज दाखल केला आहे. नागपूर येथील वकिलामार्फत दाखल याचिकेवर सोमवारी सुनावणी होणार आहे. मिंथूर येथील पीडित रोशन कुळे यांच्या तक्रारीवरून हे रॅकेट उघडकीस आले असून, त्यांच्या माहितीनुसार सुंचूला सोलापूर येथून अटक करण्यात आली होती. कोठडीतील चौकशीनंतर त्याला 12 जानेवारीपर्यंत न्यायालयीन कोठडीत पाठविण्यात आले आहे.

दरम्यान, दिल्लीतील आणखी एक प्रमुख आरोपी डॉ. रवींद्रपाल सिंग यांचा चंद्रपूर न्यायालयात जामीन अर्ज फेटाळल्यानंतर ते बेपत्ता झाल्याचे सांगण्यात येत आहे. त्यांचा मोबाईल फोन बंद असून, त्यांचा शोध घेण्यासाठी व अटक करण्यासाठी पोलिसांनी विशेष पथके तयार केली आहेत.

हिंदुस्थान समाचार / एम.पंकजराव