सिंधुदुर्ग, 13 जानेवारी, (हिं. स.) : सिंधुदुर्ग जिल्ह्यातील ज्येष्ठ कथामाला कार्यकर्ते आणि मालवण साने गुरुजी कथामालेचे अध्यक्ष सुरेश शामराव ठाकूर यांना अखिल भारतीय साने गुरुजी कथामालेचा केंद्रीय बालसेवा पुरस्कार बेळगाव येथे सपत्नीक प्रदान करण्यात आला.
अखिल भारतीय साने गुरुजी कथामाला आणि दक्षिण महाराष्ट्र शिक्षण मंडळ बेळगाव (कर्नाटक) यांच्या संयुक्त विद्यमाने बेळगाव येथे लोकनेते प्रा. एन. डी. पाटील कथानगरीत कथामालेचे अमृत महोत्सवी अधिवेशन अलीकडेच झाले. ठाकूर यांच्या गेल्या ५५ वर्षांच्या बालसेवेच्या कार्याचा विचार करून त्यांना केंद्रीय बालसेवा पुरस्कार हसन देसाई (केंद्रीय अध्यक्ष, साने गुरुजी कथामाला) आणि आकाश शंकरराव चौगुले (आयआरएस अप्पर आयुक्त, जीएसटी, बेळगाव) या मान्यवरांच्या हस्ते प्रदान करण्यात आला. अकरा हजार रुपये रोख, सन्मानचिन्ह, सन्मानपत्र, शाल,श्रीफळ असे पुरस्काराचे स्वरूप होते.
यावेळी व्यासपीठावर डॉ.प्रा.आनंद मेणसे (विचारवंत आणि साहित्यिक, बेळगाव), लालासाहेब पाटील (विश्वस्त, केंद्रीय कथामाला), राजाराम विठ्ठलराव पाटील (अध्यक्ष, दक्षिण महाराष्ट्र शिक्षण मंडळ, बेळगाव), बाबुराव पाटील (कार्याध्यक्ष, कथामाला), सुनील पुजारी (प्रमुख कार्यवाह, कथामाला), गजानन कोटेवार (प्रमुख संघटक, कथामाला) आदी पदाधिकारी उपस्थित होते.
प्रारंभी लालासाहेब पाटील यांनी ठाकूर यांच्या 55 वर्षांच्या कथामाला कार्याचा आढावा घेतला. ते म्हणाले, ठाकूर यांचे व्यक्तिमत्त्व कथामाला संस्थापक प्रकाशभाई मोहाडीकर यांच्या मुशीत तयार झालेले आहे. त्यांचे कार्य अभिजात आहे.
सत्काराला उत्तर देताना ठाकूर गुरुजी म्हणाले, हा माझा एकट्याचा सत्कार नसून माझ्यावर प्रारंभी कथामालेचे संस्कार करणारी मालवणची बॅ. नाथ पै सेवांगण ही संस्था, तेथे चालणारी कथामाला तिचे आधारस्तंभ मधू
वालावलकर, ज्ञानेश देऊलकर, श्रीपाद तोंडवळकर यांचा आहे. तसेच माझ्यावर कथामालेचे संस्कार करणारे कथामालेचे संस्थापक प्रकाशभाई मोहाडीकर,
कथामाला मासिकाचे संपादक मधुभाई नाशिककर, कथामाला सेवाभावी कार्यकर्ते राजाभाऊ मंगळवेढेकर, प्र. दी. पुराणिक, चंद्रकांत पाडगावकर, न्यायमूर्ती चंद्रशेखर धर्माधिकारी, प्रा. राम शेवाळकर, थोर विभूती नरूभाऊ लिमये, शिरुभाऊ लिमये आदी बुजुर्गांचा हा सत्कार आहे. माझ्यावर कथानिवेदनाचे संस्कार पुण्यातील कथाकथन प्रबोधिनीतील प्रा. ग. म. केळकर, द्वारकानाथ लेले, अनिल गोडबोले, मुकुंद तेलिचरी यांनी बिंबविले. त्यांचा हा सत्कार आहे. यापैकी एकही विभूती आज देहरूपाने उपस्थित नसली तरी त्यांच्या पवित्र स्मृतींना मी माझा बालसेवा पुरस्कार अर्पण करतो.
यानंतर विविध परिसंवाद आणि मान्यवरांची भाषणे झाली. यावेळी गोवा कथामालेला आदर्श कथामाला पुरस्कार आणि राजन तांबे (वरळी, मुंबई) यांना आदर्श कथानिवेदक पुरस्कार प्रदान करण्यात आला. सुनील पुजारी यांनी आभार मानले.
यावेळी गोवा, बेळगाव, पुणे, मुंबई, ठाणे, सातारा, सांगली, माजलगाव, बीड, पालघर आदी अनेक ठिकाणाहून बहुसंख्येने कथामाला कार्यकर्ते उपस्थित होते.
---------------
हिंदुस्थान समाचार / रत्नागिरी
